Wala’y klase atol sa IEC

CEBU, Philippines – Wala’y klase ang mga tunghaan sa tulo ka dakbayan atol sa pagpahigayon sa mga kalihukan sa 51st International Eucharistic Congress.

Kini subay sa kamanduan ni Department of Education Secretary Armin Luistro ngadto sa mga Schools Division Superintendents sa Dakbayan sa Sugbo, Mandaue ug Lapu-Lapu.

Sa Dakbayan sa Sugbo, wala’y klase sugod sa Enero 25 hangtud 30; sa Mandaue sa Enero 25 hangtud 29 ug sa Lapu-Lapu sa Enero 27 hangtud 29.

Tuyo niini nga maluag ang dagan sa trapiko sa kadalanan ug paghatag og higayon sa mga tinun-an nga makasaksi ug makasalmot sa ubang kalihukan sa IEC.

Hinuon, sa memorandum nga giluwatan ni DepEd-7 Director Julieta Jeruta gimando ang pagpahigayon og make-up classes aron mahulipan ang mga adlaw nga wala’y klase.

Si Lapu-Lapu City Schools Division Superintendent Marilyn Andales nikompirmar nga nakadawat na sila sa kamanduan ni Jeruta.

Ang siyudad ang usa sa hosts sa Youth Congress sa IEC diin 5,000 ka langyaw ug lokal nga delegado ang mangabot sa Enero 27 samtang sa  Enero 28, magtapok sa Hoopsdome.

Gikan sa Hoopsdome, ipahigayon ang Jericho Walk sa hapon sa Enero 28 agi sa Mandaue-Mactan Bridge padulong sa Mandani Bay sa North Reclamation Area sa Dakbayan sa Mandaue.

Matud ni Mayor Paz Radaza nga aduna sila’y giplano nga programa nga ipresentar sa welcome dinner sa mga delegado ug usa na niini ang dance number sa mga pinili’ng estudyante gikan sa nagkalain-laing mga tunghaan sa siyudad. – /GMR) (BANAT NEWS)