20-anyos lalaki gipusil sa 3 ka tawo

CEBU, Philippines – Patay ang 20-anyos nga lalaki nga gitabangan sa pagpusil sa tulo ka armado’ng lalaki nga nagsakay og motorsiklo sa dalan M.L. Quezon, Maguikay, Dakbayan sa Mandaue alas 4 pasado kagahapon sa kadlawon.

Si Police Officer 2 Oliver Gipanao sa Presinto 4 sa Mandaue City Police Office niila sa biktima nga si Dominic Dinoy Paleña, ulitawo, wala’y trabaho nga nagpuyo sa mao’ng dapit.

Matud ni Gipanao nga nagbarug-barug lang ang biktima diha’ng nahidangat ang tulo ka wala hiilhi’ng mga lalaki nga nagsakay og itom nga Honda XRM nga motorsiklo ug nagtinabangay sa pagpusil.

Patay diha-diha ang biktima kinsa nakaangkon og mga samad pinusilan sa ulo, dughan, tiyan ug uban pa’ng bahin sa kalawasan.

Dali nga nisibat ang mga   mamumuno.

Dugang ni Gipanao nga sa crime scene ila’ng napalgan ang 16 ka kabhang sa kalibre .45 ug upat ka kabhang sa bala.

Si Gipanao niingon nga sa mga pakisusi nga ila’ng gihimo ila’ng nasuta nga ang biktima nalambigit sa kalihukan sa ilegal nga druga sa mao’ng dapit ug kini mao’y usa sa mga anggulo nga ila’ng gisusi. – /GMR) (BANAT NEWS)