Eskina Canduman butangan og e-traffic lights, CCTV

CEBU, Philippines - Lakip sa butangan og electronic traffic lights ug closed circuit television (CCTV) camera ang eskina H. Abellana ug Jose P. Rizal sa Basak, Dakbayan sa Mandaue nga kanunay mahitaboan sa mga aksidente sa mga sakyanan.

Kini nalakip sa siyam ka intersections sa dakbayan nga butangan sa mao’ng kahimanan nga gigahinan og P39 milyones.

Gisugdan na sa pagpangtaud ang dugang mga electronic traffic lights sa kontraktor nga nakakuha sa kontrata sa kagamhanan sa dakbayan sa Mandaue.

Nasayran nga daghang naaksidente sa mao’ng lugar sa niagi’ng tuig nga nakakalas gyud og kinabuhi nga naglakip sa usa ka pastor sa simbahan sa usa ka relihiyon kinsa naputol ang lawas nga nalatayan sa wing van nga sakyanan.

Si Timothy James Ong, operations head sa Truine Electronic Systems, niingon nga ang mao’ng matang sa teknolohiya ang daku gyud og ikatabang alang sa hapsay nga dagan sa mga sakyanan sa kadalanan sa dakbayan.

Matud ni Ong nga gawas sa siyam ka electronic traffic lights malakip usab nila pagpahimutang ang 42 ka CCTV cameras nga mao’y magsilbi’ng kahimanan alang sa pagtan-aw sa kahimtang sa trapiko.

Daku usab kini og ikatabang alang sa pag-monitor sa mga panghitabo sa kadalanan nga mugna sa mga dautang pundok nga mobiktima sa mga ordinaryo’ng trabahante sama sa pagpanulis, pagpanglabni, pagpangilad ug uban pa.

Kahinumduman nga una’ng gitaud sa nahisgutang kompaniya ang 12 ka electronic traffic lights sa 12 ka intersections sa dakbayan nga gigahinan og P40 milyones. (BANAT NEWS)