Negosyante gituok, gitulis

CEBU, Philippines - Kapin sa P300 mil nga balor sa butang ang nahanaw sa usa ka negosyante’ng babaye human ang iya’ng lawak gilungkab sa wala mailhi’ng kawatan sa Barangay Lugo, Lungsod sa Borbon kagahapon sa kadlawon.

Ang kapolisan miila sa biktima nga si Lalaine Densing Pedios, 51, molupyo sa mao’ng dapit.

Matud ni PO1 Raffe Tejares sa Borbon Police Station nga ang biktima samtang natulog nakadungog kini og kasikas gawas sa iya’ng kuwarto.

Diha’ng gisusi, iya’ng nakita ang kawatan nga nagtabon sa nawong og kalit lang nituok sa biktima kinsa nisukol usab pinaagi sa pagpaak sa kamot sa kawatan apan gisumbag kini sa tiyan hinungdan nga nawad-an sa panimuot.

Pila ka oras nakamata si Pedios ug iya’ng nakita nga nagkatag na ang iya’ng mga butang. Base sa imbestigasyon, nasuta nga nawad-an si Pedios og usa ka bulawan kwentas nga mobalor og P100,000 ug salapi nga nagkantidad og P210,00.

Dugang ni SPO3 Owen Batikwang nga ang suspek nakasulod agi sa kisame sa pansayan sa balay ug nigamit og wire aron makakanaug. (BANAT NEWS)