UAAP player gipasidunggan sa Talisay

CEBU, Philippines – Gipasidunggan sa konseho sa Dakbayan sa Talisay ang usa ka basketbolista nga nahimong popular human nakampiyon sa University Athletic Association of the Philippines (UAAP) sa kauluhan sa niaging tuig.

Si Roger Ray "RR" Pogoy, 23-anyos, taga Barangay Cansojong, Dakbayan sa Talisay ang gitagaan og pahalipay sa konseho nga gipangulohan ni Bise Mayor Romeo  Villarante.

Si Konsehal Danny Caballero, presidente sa Talisay Basketball Association (TBA), niduso og resolusyon sa pagpasidungog ni Pogoy.

Si Pogoy ang kanhi magduduwa sa University of Cebu (UC) ug gikuha sa Far Eastern University Tamaraws ug mao sab ang nagtukmod sa ilang team nga makab-ot ang korona human nakahimo og importanteng mga puntos sa hinapos nga bahin sa duwa tali sa University of Sto. Tomas (UST) Growling Tigers sa ila’ng championship game.

Si Caballero nagkanayon nga angay lang pasidunggan si Pogoy gumikan sa iyang abilidad nga gipakita nga mao sab ang nakapaila sa Talisay tungod kay kini lumad nga natawo sa lugar. (/GMR) (BANAT NEWS)