2 cellsites sa Apas ipabalhin
CEBU, Philippines – Pasirad-an sa kagamhanan sa Dakbayan sa Sugbo ang duha ka cell sites sa Barangay Apas human sa mga nadawat nga reklamo kabahin sa kadaut nga gikahatag niini sa panglawas sa mga residente.
Si acting Mayor Edgardo Labella ang niluwat og closure order sa duha ka cell sites sa Sitio Calvary Hills gahapon human niya nadawat ang rekomendasyon sa City Legal Office ug sa City Health Department.
Ang mga cell sites iya sa Globe Telecommunications ug Sun Cellular.
Gikataho nga may namatay na nga residente sa cancer gumikan sa radiation.
Si Labella nimando sa Prevention, Restoration Order, Beautification, Enhancement (PROBE) Team ug sa kapolisan nga i-serve ang order.
Ang Sun Cellular pinaagi sa legal counsel nga si Atty. Darwin de Leon mangayo og extension aron makakita sila og maayo nga relocation site sanglit wala nila damha ang mao’ng mando human sa maayo’ng pakigsabot sa kagamhanan sa barangay.
Matud ni de Leon nga dili sayon nga hunungon diha-diha ang operasyon sa usa ka cell site tungod sa coverage niini.
Ang Globe sa ila’ng bahin andam na sa pagbalhin sa laing lugar matud ni Yoly Crisanto, ang senior vice-president for corporate communications division sa Globe Telecom. (Sheriza Mae R. Uy/GMR)(BANAT NEWS)
- Latest
