Duterte, Cayetano nagpabatyag sa sugbo

CEBU, Philippines - Gilusad sa kampo ni Davao City Mayor Rodrigo Duterte ug Senador Alan Peter Cayetano ang Tunog ng Pagbabago concert kagabii sa Plaza Independencia sa Dakbayan sa Sugbo.

Apan si Duterte niklaro nga dili pa kini kampanya alang sa iya’ng kandidatura sa pagka-presidente kauban ni Cayetano sa pagka-bise presidente.

Matud ni Duterte nga unang tumong niya ang pagpakighimamat sa iyang kaliwatan ilabi na sa Dakbayan sa Danao diin natawo ang iyang amahan. Gipasabot ni Duterte nga padayon pa nilang giplano ang makinarya sa nasudnong kampanya ilabi na nga wala siya nasayud kung nganong naabot niini nga unta mayor ra man siya.

Si Duterte maisugon nga nideklarar nga iya’ng puhagon ang mga kriminalidad ilabi na sa ilegal nga drugas sulod sa unom ka buwan kung siya ang ma-presidente.

Iya usab giklaro nga dunay patay nga mahitabo sa iyang pamunoan ilabi na niadtong nalambigit sa sindikato ug iyang gamiton ang tanang gahum aron mapanalipdan ang katawhang Pilipinhon.

Samtang nihangyo si Duterte sa publiko nga dili paminawon ang iyang pagkahimalikas kun dili ang tan-awon ang iyang pagkatawo ug ang gibuhat sa Dakbayan sa Davao. Iyang gipasabot nga ang pulong nga iyang malitok nagsulti kini sa tinuod nga kahimtang sa nasud. Usa sa plataporma ni Duterte ug Cayetano ang pederalismo.

Gisalikway ni Cayetano ang pamahayag sa iyang kaatbang nga si Senador Chiz Escudero nga dili mosalir ang ila’ng plano.

‘’Failure is guaranteed to people who will not even try,’ matud ni Cayetano.

Ang dili pagpabor ni Escudero sa pederalismo matud ni Cayetano makita kung giunsa pagbahin-bahin ang P3 trilyones nga budget sa nasudnong kagamhanan karong tuiga diin 33 porsiyento gihatag sa Metro Manila samtang 9 porsiyento sa Visayas ug P14 porsiyento sa Mindanao.  (BANAT NEWS)