Gikan sa eskwelahan naligsan patay
CEBU, Philippines – Patay ang 6-anyos nga bata nga nadasmagan og closed van-type nga sakyanan sa Barangay San Jose, Lungsod sa Catmon alas 4 pasado niadto’ng Martes sa hapon samtang pauli na unta gikan sa eskwelahan.
Si Police Officer 1 Tirso Coming sa Catmon Police Station niila sa biktima nga si Clint Julian Salas Dignos, nagpuyo sa Barangay Bawo, Lungsod sa Sogod, apan nagtungha sa Grade 1 sa Catmon Elementary School.
Ang sakyanan nga nakadasmag iya sa ADSIA Logistics Inc. sa Basak, Lapu–Lapu City ug gimaneho ni Elmer Jabil Gardiane, 29-anyos, taga A. Corona, Bagong Barrio, Caloocan City apan kasamtangang nagpuyo sa Agus, Siyudad sa Lapu-Lapu.
Paingon sa Dakbayan sa Sugbo ang sakyanan dihang kalit lang nilabang sa dalan ang biktima.
Ang biktima nakaangkon og grabeng kadaut sa iyang kalawasan hinungdan nga daling gihatud sa Sogod District Hospital.
Apan human sa pipila ka gutlo, si Dra. Ellen Ela Cruz nideklarar sa bata nga nakabsan gyud sa iyang gininhawa.
Paingon na unta motahan ang drayber apan iyang nasugatan ang kapolisan hinungdan nga siya gidakop ug gitanggong sa Catmon Police Station. – /GMR) (BANAT NEWS)
- Latest
