Nagtaud sa damba nakuryentehan patay

CEBU, Philippines – Patay ang usa ka construction worker dihang nakuryentehan atol sa pagtaud sa damba sa usa ka apartment gahapon sa buntag sa dalan Avila, Mt. View Village, Kalunasan, Dakbayan sa Sugbo.

Giila ang lalaki nga si Benjamin Panoncialman, 29, molupyo sa Banawa, Barangay Guadalupe.

Matud ni Kapitan Nunilon Monares nga si Panoncialman nagtaud sa damba sa apartment apan wala damha nga nasabod ang wire hinungdan nga nakuryentehan.

Naabtan pa sa Banat News nga naghigda si Panoncialman sa damba nga gitabang sa mga rescuers.

Nalangan ang mga rescuers sanglit nagpaabot pa sila nga maguba ang birha sa bintana nga bildo aron didto iagi ang lawas sa biktima.

Luspad ug wala na’y imik nga gikanaug ug gisakay sa ambulansya padulong sa tambalanan ang biktima.

Sumala pa ni Nicanor Caburnay, kauban nga panday, nga giwahing ni Panoncialman ang basa nga kahoy nga nakasaghid sa live wire nga mao’y nakapakuryente niya.

Gipasalig hinuon ni Darrel Pasion, anak sa tag-iya sa balay, nga dili nila pasagdan ang biktima.

Kagahapon sa hapon gikonpirmar ni Teresa Payos, barangay tanod sa Kalunasan nga kuyog sa biktima sa paghatud sa Cebu City Medical Center nga si Panoncialman patay na tungod sa grabeng kadaut nga naangkon.  – /GMR) (BANAT NEWS)