Tulo nalanag sa balanghoy, usa patay

CEBU, Philippines – Patay ang usa ka bata samtang nasalbar pa ang iyang duha ka igsuon human sila nangalanag sa gikaon nilang balanghoy  nga ilang gipanihapon niadtong Martes sa gabii sa Barangay Balaygtiki sa Lungsod sa Dumanjug.

Si Police Officer 1 Vilma Caballero, imbestigador, miila sa namatay nga si Noven Pasuquin Monteza, 6, samtang ang nalanag mao ang iyang mga igsuon nga sila si Marilyn, 9 ug Dexter, 2.

Matud pa ni Caballero, nga nahinabi sa Banat News nga nakadawat sila sa taho kagahapon na sa buntag bahin sa hitabo maong ilaha kining giimbestigar.

Base sa pamahayag sa ginikanan sa mga bata nagluto sila og balanghoy nga maoy ilang gisaw-an sa panihapon.

Apan sa alas 9 sa gabii mireklamo na si Noven sa kasakit sa iyang tiyan ug wa kini niundang hangtod nga sa pagka-kadlawon sa sunod adlaw ug pagkataud-taod nagbula-bula ang baba ug nakabsan sa kinabuhi.

Tungod sa kahilit sa ilang gipuy-an walay napangayoan og tabang ang magtiayon nga sila si Tirso ug Geralyn ug igo na lang sila nga naglantaw nga nabugtoan sa kinabuhi ang ilang anak.

Gipahigda na lang nila sa banig ang bata ug gihabolan samtang naghuna-huna kun unsay ilang buhaton.

Apan sa alas 6 kagahapon sa buntag nisuol na ‘sab ang tiyan sa duha pa nila ka mga anak hinungdan nga nanawag na lang gyud sila og tabang sa mga silingan sa pikas bungtod ug nadala sa Barili District Hospital ang duha.

Ang mga bata luwas na ang kahimtang sa Cebu Provincial Hospital sa Carcar City.

Gibutyag ni Caballero nga sa iyang pakighinabi sa tambalanan mikompirmar ang representante sa hospital nga maayo na ang kahimtang sa duha ug nakagawas na sila sa emergency room.

Samtang gipahiluna usab sa pamilya ang namatay nga bata. – /EIM) (BANAT NEWS)