Gibuwagan sa uyab naghikog patay
CEBU, Philippines – Patay na nga nadiskubrehan sa iya’ng mga kauban ang 18-anyos nga lalaki nga naghikog gamit ang habol sulod sa staff house sa usa ka tindahan sa Barangay Poblacion, Sante Fe pasado alas 3 sa nakalabay nga kadlawon.
Ang namatay giila nga si Jack Manulat, ulitawo nga taga Sandayong Sur, Dakbayan sa Danao.
Matud ni Police Officer 2 Jeffrey Barco, desk officer sa Sante Fe Police Station, nga pipila ka adlaw na ang nakalabay nabantayan sa iya’ng mga kauban nga masulob-on si Manulat human kini gibuwagan sa uyab sa mao’ng lungsod.
Nadiskubrehan na lang sa mga kauban nga trabahante sa tindahan nga nagbitay na sa ila’ng lawak si Manulat gamit ang habol nga gihigot sa liog ug gibaat sa beam sa lawak.
Giigong gisuwayan pa og hangyo ni Manulat ang uyab nga magbalik na sila apan wala nisugot. Grabe’ng kasakit sa kapakyasan sa gugma ang nakita nga motibo sa kapolisan kung ngano’ng gikutlo ni Manulat ang iya’ng kinabuhi. Suway pa unta nga gitabang sa mga kauban apan nakabsan gyud kini sa iya’ng gininhawa. – /GMR) (BANAT NEWS)
- Latest
