Midagit sa masuso nadakpan

CEBU, Philippines – Babayeng nidagit sa duha pa ka adlaw nga masuso gikan sa Vicente Sotto Memorial Medical Center niadtong Lunes nadakpan sa mga sakop sa Criminal Investigation and Detection Group-7 ug nabawi usab ang usa ka masuso gikan kaniya kagahapon sa hapon.

Ang maong babaye nga giilang si Mellisa Lundres, 27, gikatahong gradwado sa usa ka unibersidad dinhi sa Metro Cebu, gikatahong nadakpan sa grupo ni Senior Inspector Delfin Bontuyan diha sa Sitio Fatima, Brgy. Lahug ning dakbayan sa Sugbo.

Lakip sa gidala sa CIDG-7 si Philip Almerilla, 25, taga Antique nga uyab ni Lundres kinsa dili motuo nga anak kini sa iyang uyab.Matud pa nakadawat sila og impormasyon gikan sa usa ka sakop sa media nga adunay mipahibalo kaniya nga aduna kini silingang babaye nga nagdala og masuso nga may pagkaparehas sa dagway sa babayeng nakuhaan og footage sa closed-circuit television camera sa VSMMC.

Ang maong sakop sa media nga si Arnold Bustamante sa dyHP mipahibalo dayon sa CIDG-7 bahin sa impormasyon ug daling giadto ang lugar ug didto ilang naabtan si Lundres sud sa balay ug namay-ongan dayon nga parehas sa dagway sa babaye sa cctv footage hasta ang masuso diha sa sud sa balay niini.

Apan si Lundres nangangkon nga iyang anak ang maong masuso ug siya nangangkon sa mga silingan nga nakaanak kini sud sa taksi.

Apan di makatuo ang mga silingan gumikan kay wala man nila makita nga nagmabdos kini.

Kagabii, daling giadto sa amahan ni Prince Niño nga si Jonathan Celadiña ang CIDG-7 ug didto positibo niining giila ang bata nga ilang anak ug wala niya kapugngi ang pagluha sa tumang kalipay pagkakita sa ilang kinamanghorang anak. Positibo usab niyang gitumbok si Lundres nga mao ang babayeng iyang gikaatubang dihang gikuha niini ang iyang anak aron kunohay dad-on sa laboratory aron bakunahan.

Nisuway sa maternity

Nasayran nga ang suspek gituohang nisuway usab og panagit sa Cebu Puericulture Center and Maternity House Inc.(Maternity hospital) sa B. Rodriguez St. Sambag 2, Cebu City sayo niadtong adlaw nga Lunes sumala pa sa report sa TV Patrol Central Visayas.

Ang maong babaye nga nagsuot og uniporme sama sa usa ka medical personnel ug nagtaptap og surgical mask nakuhaan usab og footage sa closed-circuit television camera sa maong tambalanan.

Una niini, miduol siya sa gwardiya ug gikatahong nagpaila nga usa ka intern ug nangutana kun asa ang labor room maong gitudlo kini sa gwardiya ug midiretso og sud didto ang maong babaye.

Apan didto sa sud, adunay staff nga nisita kaniya ug gipangutana siya kun unsa iyang tuyo, matud pa nagpaila kini pag-usab nga usa ka intern apan gipagawas kini. Gikan didto nigawas ang maong babaye sa maong tambalanan ug nakita sa CCTV diha sa gawas nga padung kini sa direksyon sa kasikbit nga tambalanan sa Vicente Sotto Memorial Medical Center nga diin paglabay sa pipila ka oras adunay duha pa ka adlaw nga masuso ang gidagit.

Ang nagdagit, susama og dagway ug gisuot sa babayeng nisuway og sud sa labor room sa Maternity hospital.

Kuwang sa seguridad

Ang Department of Health -7 may nakita nga kakuwang sa gipatumang seguridad, apan walay nakitang lapso sa policy and procedure sa VSMMC bahin sa pagdagit sa anak sa magtiayong Jonathan ug Jayvee Celadiña nga si Prince Niño.

Kagahapon lang nadawat sa DOH-7 ang report kalabot sa insidente, ug sa gihimong press briefing nga gihimo ni Assistant Regional Director Sophia Mancao, kini miangkon nga bisan pa sa kaestrikto sa seguridad sa VSMMC aduna gihapon siyay nakitang lapso niini.

Usa niini mao ang wala pagbutang og gwardiya sa dapit nga gihimong temporaryong delivery room sa tambalanan. Ang delivery room sa VSMMC kasamtangan pang gitukod.

Si Dr. Gerardo Aquino pangu sa VSMMC miduso na og incident report ngadto sa DOH-7.

Planado ang lihok

Ang ahensiya magpaabot pa sa resulta unya sa gihimong imbestigasyon sa kapulisan ug sa National Bureau of Investigation (NBI) diin midangop ang pamilya sa bata.

Si Senior Inspector Randy Caballes, pangulo sa Fuente Police Station nibutyag nga gawas sa nakuhang footage sa CCTV sa VSMMC, tinguha sa kapolisan nga matan-aw ang mga CCTV sa kaatbang nga mga edipisyo aron masuta ang dugang pa nga kuha sa nagpailang nurse.

Wala hinuon gisalikway sa DOH-7 ang posibilidad ang  nga adunay inside job nga nahitabo mao nga sayon ra nga napagawas ang bata. Ang mga empleyado sa VSMMC nga anaa sa dapit diin nahitabo ang pagdagit sa bata gipaubos karon sa imbestigasyon.

Matud ni Mancao ug Caballes planado kaayo ang pagdagit tungod sa pamaagi sa pagkawat diin nag-uniporme pa ang babaye og susama sa nurse ug suhito kini sa iyang padulngan pagawas.

P100 mil reward

Si Dr. Gerardo Aquino miingon nga ilang ihatag ang gitanyag nga P100 mil nga cash sa tambalanan ngadto sa tawong nakahatag og impormasyon kagahapon nga niresulta sa pagkasikop sa maong suspek ug pagkabawi sa masuso.

Human sa maong insidente, mas giestrikto pa sa maong tambalanan ang seguridad ilabi na ang pagsuot sa ID ug sa uniporme.

Kagahapon lang, aduna'y 1,042 ka pasyente ang VSMMC ug kapin sa 1,000 ka kawani niini gawas pa sa tagduha ka watchers matag pasyente ang sud sa maong tambalanan.

Seguridad pahugtan

Giawhag ni Cebu City Acting Mayor Edgardo Labella ang tanang pribado ug pampublikong tambalanan sa dakbayan nga pahugtan pa gyud ang seguridad sa ilang mga pasilidad ilabi na sa mga butanganan sa mga bag-ong natawo.

Kini aron paglikay sa nahitabo sa Vicente Sotto Memorial Medical Center (VSMMC) sa pagkawat sa masuso diha sulod sa tambalanan.

Buot usab ni Labella nge estriktuhon na ang pag-monitor sa  mga mosulod ug mogawas sa mga   tambalanan.

Si Gob. Hilario Davide III mimando usab sa tanang mga tambalanan sa probinsya sa pagbutang og CCTV cameras aron makatabang sa seguridad.  – Jojo Ugdol, Rowena Capistrano, Sheriza Mae R. Uy ug Brenda Batuto/EIM) (BANAT NEWS)