Bayaw di stray bullet ang nakaigo

CEBU, Philippines – Nakuhaan og usa ka kaso ang talaan sa mga naigo sa saag nga bala sa pagsugat sa bag-ong tuig kini human nasayran ang usa kanila gituyo gyud pagpusil sa iyang bayaw.

Nadiskubrehan sa mga imbestigador sa Homicide Section sa Cebu City Police Office nga napusilan diay sa iyang bayaw si Jovelyn Pocot nga taga Sitio Kamansi, Brgy. Mabini ning Dakbayan sa Sugbo.

Sumala pa ni Senior Police Officer 2 Ruth Violango nga nahinabi sa Banat News nga kritikal hangtod karon ang kahimtang sa biktima kinsa naigo sa ubol-ubol ug milapos ang bala sa iyang tingkoy.

Gitudlong suspek sa hitabo mao ang iyang bayaw nga si Isabelo Bayon Jr., nga gikatahong pwerteng huboga nga nagpabuto sa iyang pistola.

Sumala pa ni Violango nga migawas sa ilang imbestigasyon gikan sa mga silingan nga wa maigo og saag nga bala ang biktima kondili napusilan kini sa igsuon sa bana sa biktima dihang nagkasugat ang duha niadtong pagsugat sa Bag-ong Tuig.

Tungod niini ilang gibalikan ang biktima sa tambalanan diin kini nakatubag sa mga pangutana pinaagi sa pagyango-yango ug paglingo-lingo.

Ang suspek nagtago-tago sukad sa pagkahitabo, bisan ang bana sa biktima gikatahong way nakuhang impormasyon ang kapolisan.

Apan niadtong nakalabay nga gabii, miadto sa Homicide Section ang suspetsado kay gusto daw niini nga malimpyo ang iyang pangalan ug gikan didto gidala kini ngadto sa biktima diin positibo kining gitumbok sa ginang nga maoy nakapusil kaniya.

Si Violango miingon nga daku ang posibilidad nga aksidente lang ang nahitabo sa biktima kay walay bingkil ang duha apan hubog atol sa hitabo ang suspek.

Matud pa ni Violango nga kung dili mopasaka og kaso ang bana o ang biktima , sila sa kapulisan na ang mobarog nga reklamante sa hitabo uban sa pagpasaka og kasong frustrated murder.

Wala na narekober sa mga polis ang armas nga gigamit sa suspetsado  apan upat ka basiyo sa bala sa kalibre .45 ug usa ka basiyo sa cal. 38 ang ilang na-rekober diha sa crime scene ug gipaubos na sa ballistic examination.

Sa pagsugat sa bag-ong tuig upat ka mga kaso sa stay bullet ang natala sa kapulisan sa Dakbayan sa Sugbo diin tulo ka mga tawo ang naangol. – /EIM) (BANAT NEWS)