Balay sa polis gilungkab

CEBU, Philippines – Gikawatan sa wala mailhing kawatan ang usa ka polis sa panimaye niini sa Barangay Jaclupan, Dakbayan sa Talisay sa niaging gabii.

Ang biktima mao si SPO1 Esperidion Espina, 36-anyos, minyo, kinsa nadestino sa Provincial Public Safety Company.

Matud ni PO3 Jason del Campo sa Talisay City Police Station nga nibiya si Espina ug ang iyang pamilya sa ilang panimaye aron pagtambong sa lubong sa iyang pag-umangkon.

Apan sa ila’ng pagbalik, nagkatag na ang ilang mga butang sa panimaye.

Asoy ni del Campo nga ang kawatan nipuntariya sa personal nga armas sa biktima nga .45 nga pusil nga kantidad og P25,000; 100 ka bala sa .45 nga balor og P1,200; upat ka silver spoon collection nga tag P1,000 ug gold wedding ring nga P2,500.

Nagkanayon si del Campo nga nakasulod ang kawatan pinaagi sa pagguba sa bintana nga kahoy sa panimaye sa polis.

Dihang nakasulod na, gilugit sab ang ilang cabinet kun diin gibutang ang iyang personal nga  armas.

Dugang ni del Campo nga nataud-tauran sa pagpa-blotter ang biktima tungod kay nihimo pa siya sa iya’ng kaugalingon nga pagsubay kun kinsa ang responsable sa pagkawat sa iya’ng mga butang.

Hinuon nihimo sab sa pakisusi ang kapolisan sa Talisay. – /GMR) (BANAT NEWS)