Bicycle lane human sa DPWH project
CEBU, Philippines – Gikatakda’ng ipatuman ang bicycle lane sa Dakbayan sa Mandaue human sa pagsemento sa Department of Public Works and Highways sa dalan A. Soriano ug Plaridel.
Si Architect Florentino Nimor, City Planning Officer, niingon nga buksan na unta ang bicycle lane nga manukad sa City Hall paingon sa dalan Sotero Cabahug sa Barangay Ibabao niadto’ng Disyembre.
Apan kini napugngan human nipahibawo ang DPWH nga magsugod na sila sa pagsemento sa dalan A. Soriano hinungdan sa pagsirado niini.
Gitataw ni Nimor nga ang dalan Sotero Cabahug nga mao unta ang butangan sa bicycle lane mao’y magsilbi’ng alternatibo’ng agianan sa mga sakyanan sa higayon nga sirad-an ang dalan A. Soriano.
Matud ni Nimor nga mahimo’ng buksan na ang bicycle lane sa nahisgutang dalan sa higayon nga mahuman na ang kaugmaran sa DPWH sa dalan A. Soriano ug Plaridel.
Si Nimor niingon nga giplano pa nila ang pagdugang pa og bicycle lane sa dakbayan kung ila makita nga magmalampuson ang una’ng bicycle lane.
Naglakip sa ila’ng giplano nga butangan og bicycle lane ang dalan A. del Rosario sa Barangay Mantuyong ug Guizo lahos sa Cebu International Convention Center. – /GMR) (BANAT NEWS)
- Latest
