Mamulkitay gidunggab sa magsuon

CEBU, Philippines – Gitabangan og dunggab sa magsuong drayber sa traysikad ang mamulkitay og ligid sa Mananga 2, Tabunok, Dakbayan sa Talisay kagahapon sa buntag.

Ang biktima mao si Junel Perocho, 32-anyos, ulitawo nga nagpuyo sa nahisgutang lugar.

Samtang ang mga suspek nailhan lang sa pangan nga Juan ug ang maguwang wala nailhi. Si SPO2 Cecilio Miñoza sa Talisay City Police Station nagkanayon nga ang biktima nagbarug lang daplin sa karsada diha’ng siya gibunalan og tubo sa igsuon ni Juan. Naigo ang biktima sa iya’ng tuo nga bukton apan dali sab nga nibunot sa iya’ng hait nga hinagiban si Juan ug gihansak sa lawas sa biktima.

Samdan sa tuo nga dughan ang biktima ug gidali pagdala sa Talisay City Hospital apan ang duha ka suspek dali’ng nisibat palayo sa lugar.

Matud ni Miñoza nga adunay daan nga panagbangi si Juan ug ang biktima apan nilaban lang ang igsuon ni Juan niadto’ng higayuna. – /GMR) (BANAT NEWS)