P18M para sa Sapangdaku Elementary School

CEBU, Philippines – Ang Cebu City School Board miawhag sa City Council nga hatagan og pagtugot ang mayor sa dakbayan nga makapirma og kasabotan alang sa pagpalit og yuta nga adto tukora ang bag-ong Sapangdaku Elementary School.

Ang mga tinun-an sa Sapangdaku Elementary School padayong nagklase sa temporaryo nilang classrooms sa barangay hall sa Sapangdaku kay wala na ipagamit ang ilang school building nga daplin sa sapa.

Si Mayor Michael Rama maoy mimando kaniadto nga biyaan ang Sapangdaku Elementary School building kay peligroso kini kaayo sanglit anaa kini mahimutang daplin sa Sapangdaku River.

Nakabantay ang mayor nga kun mokusog ang uwan motubo ang tubig sa sapa ug mosulod sa compound sa tunghaan nga anaa mahimutang sa lupa nga lugar ug mamilegro ang kabataan.

Si Ronald Diola nga maoy representante sa mayor diha sa City School Board mibutyag nga dunay yuta nga dul-an sa tunga sa hektareya nga haum kaayong matukoran og tunghaan kay duol ra kini sa maong dapit.

Matud ni Diola nga ang tag-iya sa yuta nga sila si Michael ug Virgilio Chua miuyon nga ang ilang 4,500 metros kuwadrado nga yuta ibaligya sa tag P4 mil matag square meter.

Si Diola miingon nga moabot og P18 milyones ang kinatibuk-ang kantidad sa maong yuta apan dili kaayo kini mahal tungod kay tag P5 mil gani unta ang pagbaligya sa matag square meter niini.

Ang kadagkoan sa City School Board miingon nga ang mga ginikanan, magtutudlo ug mga opisyal sa Sapangdaku naglaum nga unta dili langan-langanon sa City Hall ang pagpalit sa luna alang sa tunghaan. (BANAT NEWS)