Gilugos sud sa presinto?

CEBU, Philippines – Hugot nga gihimakak sa kapulisan sa Olango Island Police Station ang impormasyon nga duna’y usa ka babaye nga binilanggo sa ilang buhatan nga gikatahong gilugos sa mga pulis.

Ang hepe sa kapulisan sa Olango Island nga si Senior Inspector Jaime Tolentino nga nahinabi sa Banat News hugtanon nga mihimakak sa maong pasangil.

Matud pa ni Tolentino nga ala 1:55 sa kaadlawon sa petsa 30 sa Disyembre ilang gidakop ang usa ka 22-anyos nga dalaga, human kini gireklamo sa diskohan sa Barangay Sabang nga namuak og botelya sa ilimnon ug nanghasi tungod sa kahubog.

Sumala pa niya ilaha kining gisikop ug gipa-liquor test sa tambalanan ug kini nagpositibo maong ilaha kining gidala sa presinto aron ikostudiya.

Matud pa ni Tolentino nga imposible kaayo nga duna’y mahitabong pagpanglugos kay didto siya sa ilang buhatan ug daghan silang mga pulis nga nag-duty lakip na ang mga sakop sa Women’s Desk.

Nagduda ni Tolentino nga adunay nanaot kanila tungod sa ilang pagdakop sa maong babaye. Nasayran nga adunay nikatap nga text message nga gipadangat ngadto sa mga sakop sa media kabahin sa giingong paglugos sa mga polis sa usa ka babayeng dinakpan sud sa Olango Police Station.

“Ulaw kaayo nga pasanginlan ta ana. Lalim nimo nang gitabangan daw siya og lugos? Didto baya ko pagsikop niya, makasiguro ko  wala’y rape nga nahitabo,” saysay pa ni Tolentino.

Mibahad hinuon si Tolentino nga ilang subayon kun kinsa ang nagpakatap sa maong text kay ilang pasakaan og kaso.

“Kung kinsa man ang nagpakatap ana basta mailhan, mohimo gyud mi og counter charges, di ko mosugot nga mayabo among kaldero agi niya kay tinarong ning trabaho namo diri,” pasabot pa sa hepe sa Olango Police Station.

Karong adlawa gikatakdang dalhon sa pink room sa Vicente Sotto Memorial Medical Center (VSMMC) ang maong babaye kay gusto sa hepe klaruhon ang alegasyon.

Gipasalig ni Tolentino nga andam silang moatubang sa bisan unsa nga imbestigasyon.

Matud pa niya iyaha na nga gipahibalo ang hepe sa kapulisan sa dakbayan sa Lapu-Lapu, Sr. Supt. Armando Radoc bahin sa maong pasangil.

Ang desk officer sa maong buhatan nga si Senior Police Officer 2 Jose Daño miingon nga naglibog usab sila nganong adunay pasangil kanila nga ingon niini.

Nagduda hinuon siya nga adunay problema sa pangisip ang maong babaye kay molikoy og estorya, ug gani niadtong petsa Dec. 31 sa hapon nagligid-ligid kini sa sementadong salog sa prisohan human miawas ang tubig sa gripo.

Apan si Tolentino dili motuong adunay problema sa pangisip ang maong babaye kay matud pa miangkon man kini nga gisugo siya sa iyang mga higala nga magpabuang-buang aron pagawson sa mga pulis ug gikatahong miangkon usab ang dalaga nga tiggamitan og drugas.

“Gisugo daw ni siya nga magpabuang-buang aron among pagawson, unya lagmit kadto ra pod iyang kauban nagpakatap sa text nga gilugos ni siya,” matud pa ni Tolentino.

Karong adlawa usab gikatakda nga pasakaan og kaso’ng drunkenness sa kapulisan ang maong babaye. – /EIM) (BANAT NEWS)