Polis gibunalan og botelya sa ulo

CEBU, Philippines – Nasikop sa kapolisan sa follow-up operation ang usa ka lalaki nga nipuspos og botelya sa beer sa ulo sa usa ka polis ug nisulay og dunggab niya alas 2 sa kaadlawon niadtong Huwebes sa Barangay Mantalongon, Lungsod sa Dalaguete.

Ang nasikop naila nga si Raffy Nepomuceno, 26, taga Sitio Lapa, human nga niuli sa ila’ng balay samtang samdan sa iyang ulo si Police Officer 1 Joseph Rhinne Quilaton, taga Barangay Sacsac, kinsa gihapsan og botelya sa beer.

Base sa imbestigasyon sa kapolisan nga ang biktima kalit lang gihapsan sa suspek og botelya hinungdan nga nasamad.

Wala pa natagbaw ang suspek, ang buak nga botelya mao’y iya’ng gigamit pagdunggab unta sa polis apan maayo kaayo nga nilihay-lihay ang polis hinungdan nga wala naigo.

Dihang nakit-an silang duha sa mga residente, dali nga nitabang kanila ang mga tawo ug ni-uwang sa suspek.

Apan dihang nabadlong sila sa mga residente, nisibat ang suspek ug wala na   makit-i.

Ang biktima gidala sa Dr. Ildefonso Alcantara Memorial Hospital sa Poblacion, Dalaguete aron matambalan.

Nakagawas ra sab dayon ang polis human nga nadapatan og tambal ang samad.

Gipangita sa kapolisan sa Dalaguete ang suspek human nga ni-report ang polis nga biktima sa ilang buhatan pasado alas 9 sa buntag niadto’ng Huwebes.

Apan sa gipahigayon nga follow-up operation naabtan sa kapolisan sa balay sa iyang ginikanan ang suspek pasado alas 11 sa buntag hinungdan sa iyang pagkasikop.  (BANAT NEWS)