2016 gisugat og sunog

CEBU, Philippines – Usa ka wa mailhing tawo ang napalgang napaig sa sulod sa usa ka bodega sa Arellano Boulevard, Brgy. San Roque ning Dakbayan sa Sugbo human miulbo ang sunog kagahapon sa hapon.

Ang patay nga lawas nakit-an sa sud sa nasunog nga building nga gipanag-iya sa pamilya Madrigal apan giabangan sa EMBL Enterprises nga nagbaligya og mga “imported furnitures” nga gikan sa China ug ang Du EK Sam Inc. nga nagbaligya og mga sakyanan ug mga appliances.

Sigon ni Senior Fire Officer 3 Daniel Relatado, fire investigator sa Cebu City Fire Department, nga uwahi na silang nakahibawo nga adunay tawo sa sud sa bodega dihang naghimo na sila og clearing operation.

Didto sa bodega sa Du EK Sam nakita ang paig nga lawas sa usa ka lalaki nga nag-ubo ug nadat-ugan og usa ka motorsiklo ug di na maila ang dagway niini apan nagsul-ob kini og itom nga “sweat shirt.”

Matud pa niya, way niduol kanila ug nipahibalo nga adunay tawo sa sud tungod kay nihunong sa operasyon ang EMBL niadto pang Disyembre 22 ug ang Du EK Sam niadtong Disyembre 31 pa sila nanirado tungod kay bakasyon pagsugat sa Pasko ug Bag-ong Tuig, matud pa nga bisan ang mga gwardiya wa masayod nga adunay tawo sa sulod.

Way nakaila

Apan si Relatado miingon nga aduna’y mga residente sa maong lugar ang nakahisgot sa ilaha nga nakabantay sila nga aduna’y tawo nga milukso gikan sa container van nga nahimutang kilid sa building paingon sa sud sa warehouse niadtong gabii sa Disyembre 31.

Ang kapulisan naghimo og imbestigasyon kung nganong naabot kini didto ug kung kinsa ang patay nga lawas tungod kay wala usab sa mga taga Barangay San Roque ang miila niini.

Ang sunog nadawat sa mga kabomberohan mga ala 1:05 kagahapon sa hapon ug giisa dayon kini ngadto sa first alarm. Nakontrolar hinuon kini human sa 10-minutos.

Matud ni Relatado nga wala hinuon sila naglisod sa pagpawong sa kalayo tungod kay usa kini ka confined nga bodega mao nga wala gyud mikatap sa ubang establisamento duol niini.

Base sa taho sa mga nakakita nga ang kayo unang miulbo sa warehouse sa EMBL Enterprises ug nitabok ngadto sa Du EK Sam Warehouse tungod kay usa ka sin lang pud ang nagsilbi nga division sa ilang mga lugar.

Gitan-aw pa  karon sa mga imbestigador kung unsa ang hinungdan sa sunog tungod kay matud pa, gi shut-off na ang kuryente sa building uban sa ilang paghunong sa pagbaligya.

Sigon pa nga dako ang mao nga building apan gamay lang ang mga kagamitan nga gi-display sa sulod niini ug ang danyos mokabat ngadto sa P100 mil.

DPWH warehouse

Sa laing bahin,  alas 11:55 ang takna kagahapon kalit miulbo ang kalayo sa giabandonar nga van type nga sakyanan nga gipanag-iya sa National Broadcasting Network (NBN) nga nahimutang duol sa bodega sa 6th Engineering District (DPWH) 7 nga nahimutang sa Barangay Cambaro, Dakbayan sa Mandaue.

Si Senior Fire Officer 2 Nilo Cosedo nga maoy imbestigador sa BFP sa Mandaue miingon nga dugay nang gi-parking sa atubangan sa maong bodega ang sakyanan sa NBN  tungod kay naguba na ang makina niini.

Matud pa ni Cosedo nikatap ang kalayo sa atop sa bodega sa DPWH sanglit light materials man kini  ug maayo na lang nga napawong dayon kini ug wala makamugna og dakong kadaot sa bodega.

Usa ka Willy Tuñacao nga trabahante sa nahisgotang buhatan kinsa bugtong nahibilin aron mobantay miingon nga adunay mga batang magduwa sa maong van.

Matud pa ni Cosedo  bisan ang gwardiya sa kaatbang nga establisamento mikompirmar nga aduna kini nakit-ang mga bata nga nagduwa og pabuto diha duol sa maong van ug gituohang mao kini ang hinungdan sa pagkasunog sa van.

Eskuylahan naugdaw

Kapin sa P2 milyones ang danyos sa sunog nga milamoy sa usa ka building sa Luyang Elementary School pasado alas 9 sa buntag niadtong Biyernes (Enero 1) sa Barangay Luyang, San Remigio.

Nakugang na lang si Kagawad Stephen Arminion, 39, nga naa nagpuyo sa luyo sa eskwelahan nga nagkayo na ang usa ka building niini alas 9:40 sa     buntag.

Dali siyang nangayo og tabang sa kabomberohan sa Medellin aron mapalong ang sunog nga gikan sa Home Economics Room sa maong eskwelahan.

Dali nga mikuyanap ang kayo ug nasunog sab ang duha ka classroom nga tupad sa maong room hinungdan sa pagkaugdaw niini.

Nasuta sa fire investigators sa San Remigio Fire Station nga electrical misuse ang hinungdan niini.

Nagduwa’g posporo

Samtang nasunog ang balay sa usa ka Teresita Rabor human nga nagduwa og posporo ang iyang 4-anyos nga apo sulod sa ilang balay pasado alas 2 sa hapon niadtong Biyernes sa Sitio Walog, Barangay Balabagon sa lungsod sa Moalboal.

Base sa imbestigasyon sa kabomberohan sa Moalboal nga ulahi nang nakit-an ang pagduwa sa bata sa posporo kay misilaob na ang balay.

Nabantayan sa maguwang sa 4-anyos nga bata ang sunog kay nakamata siya sa kainit.

Tungod kay wala man diha ang ilang inahan, gidala niya ang iyang manghod sa gawas samtang nagtan-aw sa ilang balay nga naugdaw sa kayo.

Ang maong sunog nagbilin og P10 mil danyos sumala pa sa Moalboal Fire Station. (Ma. Fatima R. Secuya, Romeo T. Limpangog ug Bryner Diaz/EIM) (BANAT NEWS)