Nangabuthan sa Metro Cebu

CEBU, Philippines – Bisan sa gihimong kampanya sa mga otoridad, aduna gihapoy mga nabiktima sa mga pabuto ug saag nga bala gumikan sa kawalay disiplina sa mga nagpabuto, namaligya ug mga lokal nga opisyales.

Hinuon sa  Mandaue City, ang kapolisan ug Bureau of Fire Protection (BFP) nangangkon nga milampos sila sa ilang kampanya sa pagpakunhod sa mga biktima sa pabuto sa pagsugat sa Bag-ong Tuig sa 2016 sa ilang dakbayan.

Mandaue City

Matud ni Superintendent Julian Entoma nga maoy officer-in-charge director sa MCPO  usa lamang ka insidente sa biktima sa pabuto ang ilang natala. Ang nabuthan nga gidala sa tambalanan molupyo sa Brgy. Casuntingan kinsa nabuthan sa gidagkotang pabuto.

Aduna say laing gidala sa Cortes General Hospital sa Dakbayan sa Mandaue nga nakabaton og daghang paso sa iyang kalawasan tungod sa pabuto, apan nahitabo kini didto sa Brgy. Bangkal sa Dakbayan sa Lapu-Lapu.

Ang maong lalaki nakaangkon og mga paso sa iyang dughan, bukton  ug nawong dihang napiksan kini sa pulbora sa gidagkotan nga paboto.

Dugang biktima sa pabuto ug gidala sa Eversely Child Santarium General Hospital apan taga Brgy. Nangka, Consolacion.

Pabuto gironda

Samtang nasakmit sa kapolisan sa Lapu-Lapu ang P40, 680 ka mga illegal nga pabuto sa duha ka barangay sa miaging Disyembre 30.

Matud ni Police Senior Inspector Mark Gifter Sucalit, hepe sa City Intelligence Branch sa Lapu-Lapu City Police Office ang mga pabuto ilang nasakmit gikan sa Brgy. Babag ug Calawisan.

Nakuha sa kapolisan mao ang 75 ka kahon sa piccolo nga anaa sa P7,500 ang kantidad; 112 ka coil family nga tag P13,440; 12 ka Yolanda nga tag 1,440 ; 99 ka sardinas nga pabutong nagkantidad og P7, 920 ug laing dose ka dalugdog nga tag P450. Dugang niini, adunay 9 ka kahon sa Goodbye Philippines nga anaa sa P2,250 ug laing 96 ka super whistle bombs nga gibana-banang anaa sa P7,680 ang kantidad.

Matud ni Sucalit, nangikyas ang mga manindahay niini sa dihang gironda  ang ilang mga stalls.

Mao na kini ang ikatulong operasyon nga gihimo diha sa Babag ug ikaduhang higayon sa Calawisan nga matud pa ni Sucalit anha gyud adunay daghang mopalusot og mga ilegal nga pabuto.

Putlon ang kamot

Samtang sa Brgy. Biasong, Dakbayan sa Talisay, usa ka 8-anyos nga bata ang gikabalak-ang maputlan og kamot human siya nabuthan sa gipunit niya og balik nga pabuto nga gituohan niyang nikagar lang.

Matud pa ni Police Officer 1 Othelo Largo sa Talisay City Police nga nagkalingaw ang bata uban sa iyang mga higala sa pagpabuto.

Apan matud pa adunay usa ka pabuto nga ilang gidagkotan ang wa nibuto maong iya kining gipunit apan kalit kining nibuto sa wala niya nga kamot. Matud pa  wa na  mahitsura  ang kamot sa bata.

Ang bata dali nga gidala sa Talisay City District Hospital ug gibalhin sa Don Vicente Sotto Memorial Medical Center.

Stray kwitis

Samtang   duha ka tawo usab ang naigo sa saag nga kwitis samtang sila nagtan-aw sa mga tawo nga nagpabuto atol sa pagsugat sa Bag-ong Tuig diha sa Brgy. San Isidro sa mao gihapong dakbayan. Unang nadangat sa tambalanan ang 27 anyos nga molupyo sa maong barangay human nabuthan og kwitis sa iyang tuo nga mata.

Pipila ka minuto ang nilabay, niabot usab sa mao gihapong tambalanan ang 24 anyos nga taga Brgy. Lagtang human gihapon nabuthan og kwitis sa tuo usab nga batiis.

Nagkanayon si PO1 Othelo Largo nga ang duha pulos nitug-an nga pareho silang nagtan-aw sa mga tawo nga nagpalupad og kwitis dihang kalit nga adunay kuwitis nga imbes molupad pataas, adto na man hinuon napunta kanila.

Lapu-Lapu City

Sa Dakbayan sa Lapu-Lapu, si Senior Superintendent Armando Radoc, acting police chief sa Lapu-Lapu City Police Office mitug-an sa Banat News  nga malinawon ang pagsugat sa Bag-ong Tuig sa siyudad.

Kini bisan pa adunay pito ka tawo ang nabiktima sa pabuto ug nalandig sa Lapu-Lapu City Hospital sa miaging gabii sa Disyembre 31, ug usa ka tawo ang gipusil patay.

Si Charles Ymbong, nurse on duty sa nahisgutang ospital, mibutyag nga tulo sa biktima sa pabuto gibalhin sa Vicente Sotto Memorial Medical Center ug didto na gitiwas og tambal tungod sa kagrabe sa kadaot nga ilang        naangkon.

Samtang ang tulo niini nagpabilin sa city hospital ug pulos  luwas na sa peligro.(Gabriel Bonjoc, Romeo Limpangog, Christell Fatima Tudtud/EIM) (BANAT NEWS)