ROTC officers gipaubos sa emergency training
CEBU, Philippines – Gipaubos sa emergency response training sa Provincial Disaster Risk Reduction Management Office ang tinun-an sa Lapu-Lapu City College kinsa mga opisyal sa Reserve Officers’ Training Corps.
Si Dennis Cortes, senior emergency responder/operation’s officer sa PDRRMO, nibutyag nga lakip sa training sa mga estudyante mao ang basic first aid, basic rope rescue, ambulance operation ug fire fighting.
Gibutyag ni Cortes nga ang mao’ng mga estudyante kung makakuha og permit gikatakda’ng magpahigayon og basic rope rescue sa Marcelo Fernan Bridge.
Sa basic rope rescue, ang mao’ng mga estudyante gikan sa karsada sa bridge mosaka kini paingon sa ibabaw gamit ang pisi unya mokanaug usab balik sa karsada.
Kagahapon sa buntag ang mao’ng mga estudyante nakapahigayon na og basic rope rescue diin diha nila kini gipahigayon sa habog nga punoan sa Nangka atubangan sa PDRRMO sa Capitol Compound.
Matud niya nga ang mao’ng mga estudyante mao’y labi’ng una’ng grupo nga napaubos sa nahisgutang training.
Gawas sa mga publiko nga tunghaan, ang PDRRMO motanyag usab og training ngadto sa mga pribado’ng eskwelahan nga adunay ROTC.
Ang mga napaubos sa training patukuron sila og emergency response team sa ila’ng eskwelahan. (BANAT NEWS)
- Latest
