Tour guides ipaubos sa training on canyoneering

CEBU, Philippines – Ipaubos sa training sa canyoneering ang mga tour guides sa Probinsiya sa Sugbo aron malikayan ang disgrasya. Kini human sa insidente nga usa ka tour guide ang namatay human kini mahagbong sa pang-pang ug usa ka turista usab ang nahagbong gikan sa falls sa habagatang bahin sa probinsiya.

Si Dennis Cortes, senior emergency responder/operation’s officer sa Provincial Disaster Risk Reduction and Management Office, nagkanayon nga 15 ka tour guides sa Lungsod sa Badian ug laing 15 sa Lungsod sa Alegria ug lima ka personnel gikan sa pribado’ng mga nagdumala og canyoneering sa Sugbo ang gikatakda’ng moapil sa training karong Enero 11 hangtud 15.

Matud ni Cortes nga ang local DRRMO ug mga tourism officers sa kalungsuran ang giawhag nila nga hatagan og gibug-aton ang “safety” sa mga turista ug tour guides.

Kini gumikan kay apektado ang lugar kung may mahitabo nga aksidente.

Gibutyag ni Cortes nga human sa nahitabo nga mga insidente, nakita nila ang panginahanglan sa pagpaubos sa mga trainings sa tour guides hinungdan usab nga naumol ang Provincial Eco-Adventure Management Council.

Kini gilangkuban sa Department of Environment and Natural Resources ug Department of Tourism. Ang PDRRMO nga sakop usab sa council mao’y gitahasan sa mga trainings. Lakip sa trainings ang safe water rescue ug basic first aid. Ang mga kwalipikado nga mapaubos sa training nagpanuigon gikan sa 18-anyos pataas apan dili molapas sa 60-anyos.  (BANAT NEWS)