Sinulog ug IEC giusa sa mga dayan-dayan
CEBU, Philippines – Gisugdan na pagpanaod ang mga dayan-dayan nga “Sinulog-IEC” inspired sa pipila ka mga lugar sa siyudad sa Sugbo.
Sa Fuente Osmeña makita ang bag-ong nahuman nga estraktura nga adunay hiniusang desinyo sa Sinulog ug IEC diin ang imahen sa Balaang Bata gisulod sa bildo nga orna sama sa porma sa Magellan’s Cross nga gipatong sa higanteng chalice ug sa luyo sa imahen ang higanteng hostiya.
Samtang sa base sa estraktura anaa ang hulagway ni Pope Francis ug ang logo sa International Eucharistic Congress.
Sa pikas habig sa Fuente circle ang Magellan’s Cross Design nga adunay imahen ni Senior Sto. Niño aduna usab mga simbolo sa IEC.
Matud pa ni Executive Director Ricky Ballesteros sa Sinulog Foundation Inc. gihimo kini tungod kay duha ka mga dagkong kalihukan ang ipahigayon sa dakbayan maong gituyo kini nga desinyo.
Nanghinaot si Ballesteros nga unta ang mga Sugbuanon motabang aron magmalampuson ang mga dagkong kalihukan nga mahitabo dinhi sa Sugbo.
Samtang ang over-all chairman sa 51st International Eucharistic Congress Archbishop Jose Palma nipadayag nga nakahan-ay na ang tanan alang sa dakong kalihukan. (BANAT NEWS)
- Latest
