Mga hubog atol sa Sinulog hiposon

CEBU, Philippines – Nakabantay ang kapolisan nga modagsang ang mga tawo nga hubog nga anha ra gani moligdas daplin sa karsada sa nangaging kalihukan sa Sinulog, mao nga karong tuiga ilang nahukman nga panghipuson na ang mga hubog ug dad-on sa usa ka holding center o presinto aron adto sila makapahuway.

Si Chief Superintendent Manuel Gaerlan, direktor sa Police Regional Office-7, miingon nga ila kining himoon aron dili mapahimuslan ang mga hubog sa mga badlongon ug mga kriminal.

Tungod sa maong plano, usa ka sakyanan ang gamiton sa kapolisan aron mao’y mohakot sa mga hubog ug dalhon sa usa ka lugar nga luwas nga giandam sa kapolisan.

Human sa panagtagbo sa kapolisan nga naghisgot sa seguridad sa umaabot nga Sinulog, gihisgotan usab ang plano kabahin sa mga hubog ug uban pa nga pagpangandam.

Sa maong katuyoan, makig-alayon usab ang kapolisan sa nagkadaiyang buhatan lakip na ang lokal nga kagamhanan dinhi sa dakbayan sa Sugbo.

Kini aron mahibaw-an ang dapit kun asa dalhon ang mga hubog human sila makuha nga magligdas gikan sa lainlaing mga dapit.

Apan gawas sa mga hubog, lakip usab sa bantayan sa mga polis mao ang pagpahigayon og street party sa karsada aron dili maproblema ang dagan sa trapiko.

Sigun pa ni Gaerlan nga gawas sa pagpangandam sa Sinulog, apil sa ilang gipangandaman mao ang seguridad sa umaabot nga usa ka semanang International Eucharistic Congress nga ipahigayon gikan sa Enero 24.

Seguridad sa IEC

Samtang subsob na ang pagpangandam sa mga sakop sa Police Regional Office-7 alang sa ika 51st International Eucharistic Congress sa katapusang semana ning buwana.

Lakip sa pagpangandam nga gihimo sa kapolisan mao ang paggamit sa mga teknolohiya nga makasanta sa mga kriminal.

Matud ni Chief Supt. Gaerlan, direktor sa PRO-7, nga nakahangyo na sila sa Camp Crame alang sa pagpadala og mga importanteng kagamitan sa teknolohiya nga nagkulang ang PRO-7 sa pagkakaron.

Pipila ka adlaw na ang nakalabay, duna’y mga opisyal sa kapolisan gikan sa Camp Crame nga naabot dinhi sa PRO-7 aron mosubay sa preparasyon sa kapolisan alang sa pagpangandam sa umaabot nga dakong kalihokan.

Sumala ni Gaerlan nga posibleng lakip sa ipadala nga kagamitan dinhi sa Sugbo maglakip sa mga patrol cars, motorsiklo, EOD K9 dogs, Closed-Circuit Television (CCTV) cameras, metal scanners ug walkthrough scanners.

Ang maong pagpangandam gihimo sa kapolisan bisan og wala sila’y nadawat nga bisan unsa nga hulga kabahin na sa maong kalihokan.

Dugang pa ni Gaerlan nga usa ka semana sa dili pa ang Sinulog nga sundan usab dayon sa IEC ang mga CCTV cameras ang ipangbutang na usab sa kapulisan sa mga nagkadaiyang lugar sa dakbayan. May gisugyot na nga budget alang sa umaabot nga kalihokan human nga nagpagawas og memorandum circular ang Malacañang alang sa maong katuyoan.

Samtang wala na isipa nga problema ni Gaerlan ang pagpatuman sa gun ban aron pagsiguro sa kamalinawon sa duha ka nagsunod nga dagkong kalihokan. Sugod sa tungang gabii sa Enero 9, ipatuman na usab sa Comelec ang gun ban alang sa umaabot nga eleksyon.  (BANAT NEWS)