Biktima sa trafficking namatay sa HIV-Aids

CEBU, Philippines – Usa ka 27 anyos nga babaye, kinsa biktima sa Human Trafficking ang nadugang sa listahan sa mga namatay tungod sa sakit nga Human-Immuno Virus (HIV)-Acquired Immune Deficiency Syndrome (AIDS) niadtong Disyembre 26.

Ang maong babaye namatay alas-9:15 sa kabuntagon sa usa sa mga tambalanan dinhi sa Dakbayan sa Sugbo. Ang Banat News dili mohingan sa maong babaye aron proteksyonan ang iyang pamilya, apan kini lumad nga taga Mindanao ug adunay kapuyo nga temporaryong nagpuyo dinhi sa Sugbo.

Base sa kasayuran nga nakuha sa Banat News, naabot dinhi sa Sugbo ang maong babaye sa edad nga 14-anyos human siya gipasaligan nga  patrabahuon ug maayo ang ugma nga iyang mapaabot.

Apan diay giilad siya ug pugsanong gipatrabaho sa usa ka kasa ug nahimong commercial sex worker diin gituohang diha niya nakuha ang maong sakit pipila ka tuig na ang nilabay hangtud nga hinay-hinay siyang nalupig niini ug nagpundo na lang sa balay.

Nasayran ang iyang kahimtang dihang adunay usa ka concerned citizen nga nitambong sa usa ka forum sa Caritas Cebu ug Philippine Catholic HIV and Aids Network nipahibalo sa organisasyon kabahin sa iyang pagduda nga adunay HIV ang iyang silingan.

Dali kining gisusi sa grupo ug didto nasayran nga positibo gyud sa maong virus ang maong babaye hinungdan nga ilang gidala sa tambalanan.

Si Fr. Joseph "Jojo" Aquino sa Caritas Cebu nga nahinabi sa Banat News nitug-an nga si Archbishop Jose Palma adunay kamandoan nga gihatag atol sa National Aids Day nga kinahanglang hatagan og dinalian nga pagtagad. Sumala pa ni Aquino, karong adlawa Disyembre 31, ilubong na sa iyang kapahulayan nga dayon ang maong biktima sa human trafficking ug siya mao ang momisa niini sa usa sa sam-ang dinhi sa dakbayan.

Gibutyag ni Aquino, sa wala pa namatay ang maong babaye nahatagan pa kini og pagtagad sa Cebu Caritas ug Philchan sulod sa duha ka buwan, human nasayran nga nasakit kini ug HIV-Aids. – /EIM) (BANAT NEWS)