Gihaitan sa tinan-awan namusil
CEBU, Philippines – Tungod lang kay "gitabisan" sa iya’ng silingan, 44-anyos niatake ug namusil sa Barangay Jaclupan, Dakbayan sa Talisay niadto’ng Martes sa buntag.
Ang biktima nailhan nga si Johnrey Francisco, 25-anyos, ulitawo samtang ang suspek mao si Joel Wenceslao, minyo.
Sigun pa ni PO3 Jason del Campo sa Talisay City Police Station nga nagpundo lang sa ila’ng panimaye ang biktima diha’ng giatake sa suspek ug gipusil usa ka higayon gamit ang wala matino nga armas.
Matud ni del Campo nga ang suspek nasuko sa biktima tungod lang sa tinan-awan niini nga iya’ng gihulagway nga pwerteng haita.
Nagkanayon si del Campo nga ang suspek nisumbong kaniya nga dili lang kausa ka higayun siya gitabisan sa biktima kun dili makadaghan na’ng higayon.
Niadto’ng buntaga, wala na kaagwanta ang suspek ug iya na kini’ng giduol ang biktima dayun pusil makausa ka higayon. Samdan sa iya’ng wala nga bukton ang biktima hinungdan nga gidala sa Talisay City Hospital samtang ang suspek nisibat apan dali ra sab nasikop sa mga niresponde’ng tanod. – /GMR) (BANAT NEWS)
- Latest
