Armas nasakpan sa pier, tag-iya gikasohan

CEBU, Philippines – Nag-atubang og kaso’ng kriminal ang usa ka pintor gumikan sa pagdala og armas sa pantalan.

Si Prosecutor I Fatima Asjali-Maadil nipasaka sa kaso batok kang Enrique Agripa, 44-anyos, nga taga Dasmarinas City, Cavite.

Sa inquest proceeding, ang akusado niingon kang Maadil nga dili na siya moduso og counter-affidavit sa pagtubag sa pasangil apan iya kini’ng atubangon sa korte.

Si Maadil nirekomenda og P80,000 nga piyansa alang sa temporaryo’ng kagawasan ni Agripa.

Si Police Inspector Vincent Joe Castrodes ug kauban nagkanayon nga samtang didto sila sa Cebu Port Authority niadto’ng Disyembre 19, 2015 sa alas 3:30 sa buntag, usa ka pasahero nga padulong sa Manila ang nakuhaan og armas nga Smith and Wesson Caliber .38 Revolver nga wala’y serial number.

Matud ni Castrodes nga ang grupo sa mga pintor padulo’ng sa Manila sakay sa 2GO vessel sa Passenger Terminal 1.

Pagsusi sa ila’ng bagahe, nasakpan ang usa ka armas nga gisulod sa plastic paint container.

Tungod sa kadaghang pasahero ug pareho nga mga bagahe, ila’ng gitan-aw ang close circuit television (CCTV) video ug ila’ng nakita ang tag-iya sa bagahe.

Matud ni Castrodes nga grabe ang pagka-putos sa armas sulod sa plastic paint container.

Human nila nakit-i ang pasahero sa entrance sa passenger terminal, dali nila kini’ng gidakop. – /GMR) (BANAT NEWS)