Korean restaurant gitulis, laing kan-anan gilungkab

CEBU, Philippines – Mokabat sa kapin P70 mil nga cash ang nadala sa duha ka tulisan gikan sa usa ka Korean restaurant sa Salinas Drive, Lahug, Dakbayan sa Sugbo pasado alas 4 sa nakalabay nga kadlawon.

Wala’y giila nga Christmas holiday ang mga tulisan human ila’ng gitulis ang Chuson Korean Restaurant diin ang guwardiya nakuhaan pa sa iya’ng 38 revolver nga armas.

Matud ni Senior Insp. Allan Rosario, hepe sa Mabolo Police Station, nga nahinabi sa Banat News nga paspas kaayo ang paghimo sa pagpanulis nga halos wala na niabot og usa ka minuto.

Sumala pa ni Rosario nga gani ang tapad niini nga establesemento nga duna usa’y guwardiya ang wala usab nakabantay sa pagpanulis.

Nahibalo lang ang katapad nga guwardiya sa hitabo human nakabiya na sa lugar ang mga tulisan ug nipahibalo ang iya’ng kauban nga guwardiya nga sila gisulod og duha ka tulisan.

Si Rosario nagkanayon nga paingon na unta manirado ang mao’ng restaurant apan kalit lang naabot ang duha ka tulisan nga sakay sa usa ka motorsiklo nga naka-helmet ug nideretso sa pag dis-arma sa guwardiya nga namalong og suga niadto’ng higayuna.

Nikabat sa P77,000, usa ka mahalong cellphone ug armas sa guwardiya ang nadala sa mga armado’ng tulisan.

Si Rosario niingon nga ila pa nga gipaabot ang kopya sa close circuit television (CCTV) camera sa mao’ng restaurant aron sa posible’ng pag-ila sa mga tulisan ug pagsubay sa plate number sa motorsiklo.

Samtang mokabat sa kapin P50 mil nga cash ang nadala sa kawatan human gilungkab ang usa ka restaurant sa Wilson Street, sa Barangay Lahug gihapon nga nadiskubrehan pasado alas 10 na sa nakalabay nga buntag.

Ang representante sa Kaon Ta Restaurant nga si Sara Mae Matura, 21, mao’y nagpakitabang sa kapolisan human nadiskubrehan niini nga gilungkab na ang mao’ng establesemento.

Sa imbestigasyon nga gihimo sa Theft and Robbery Section sa Cebu City Police Office nga gipangulohan ni Senior Police Officer 4 Jaime Toring nasayran nga giguba sa wala pa mailhi’ng kawatan ang kandado sa kan-anan hinungdan nga kini nakasulod.

Sulod sa kan-anan gikuha sa kawatan ang usa ka box nga duna’y sulod nga P50,000, usa ka laptop kantidad og P25,000 ug usa ka cellphone.

Ang mga sakop sa TRS padayon pa nga nihimo og dugang pakisusi sa hitabo aron pagtumbok og pagsikop sa kawatan. – /GMR) (BANAT NEWS)