‘Hot meat’ pabantayan

CEBU, Philippines – Nipahimangno ang Provincial Veterinary Office sa publiko nga magmatngon sa pagpamalit og karne karong panahona tungod sa posible’ng palusot nga hot meat o kadto’ng wala ihawa sa accredited nga ihawan.

Hinuon si Dr. Mary Ann Gabona, hepe sa public health division sa PVO, niklaro nga wala sila’y nadawat nga report nga dunay hot meat nga gipamaligya sa kamerkaduhan sa probinsiya.

Matud ni Gabona nga sa pagseguro nga dili hot meat ang karne, pwede’ng mangutana sa vendor sa meat inspection certificate (MIC) sa iya’ng baligya subay sa Consumers Act of the Philippines.

Sumala pa ni Gabona nga ilhanan sa presko nga karne mao ang may pagka-pink ang kolor ug dili lain og baho.

Samtang ang Department og Health-7 nipahimangno sa publiko nga hinay-hinay lang sa pagkaon sa salo-salo aron dili magsugat sa Bag-ong Tuig sa tambalan.

Matud ni Dr. Expedito Medalla, pangulo sa Health and Emergency Management Staff (HEMS) sa DOH-7, nga dili gyud maayo ang magpalabi ug butangan og limit ang pagkaon ilabi na sa fatty foods. Mas maayo’ng daghanon ang pagkaon og mga prutas tungod kay duna kini’y maayo’ng epekto sa panglawas.

Ang sobra nga pagkaon moresulta sa atake sa kasing-kasing ug motaas ang cholesterol mao’ng hangyo sa ahensiya sa katawhan nga mokaon og mga pagkaon nga puno sa bitamina.

Gihulagway ni Medalla nga kun maghisgut og kaluwasan sa pagkaon kinahanglan nga kung adunay sobra tabunan ug isulod sa refrigerator aron dili kini madaut ug dili usab lungkabon sa mga mananap sama sa iring ug ilaga aron dili makaon sa tawo ang salin.

Base sa record sa DOH nabantayan nga sa buwan sa Disyembre panahon sa Pasko ug Bag-ong Tuig mosaka gyud ang kaso sa hypertension ug pagsaka sa sugar nga sagad masinati sa mga hamtong.

Dugang ni Medalla nga usa sa rason ngano’ng manggawas ang sakit mao ang pagbutang og chemical sa pagkaon aron molungtad og dugay ug dili dali’ng mapan-os.

Samtang gipahibawo sa hepe sa Provincial Health Office nga si Dr. Cynthia Genosolango nga ang 16 ka tambalanan sa probinsiya andam na sa pagsugat sa Bag-ong Tuig sa pag-atiman sa mga biktima sa insidente lakip na niini kadtong mga mabuthan. Hinuon niadto’ng pagsaulog sa Pasko, matud ni Genosolango nga wala sila’y nadawat nga report nga dunay nabuthan apan nangandam gihapon sila sa pagsugat sa Bag-ong Tuig.

Si Genosolango nanghinaut nga ang katawhan nakakat-on na og leksiyon sa mga nahitabo kaniadto nga dunay daghang naputlan sa parte sa ila’ng lawas samtang uban nangabuta tungod sa pabuto.

Ang mga bata kinahanglan usab nga bantayan tungod kay dunay mga insidente nga ang biktima sa pabuto bata tungod kay namunit sa wala mobuto unya sa pagpunit niini diha pa nibuto. Ang mga tambalanan sa probinsiya adunay mga surgeon aron dunay makatahi o maka-opera kung gikinahanglan kung ugaling may mabiktima sa pabuto. – /GMR) (BANAT NEWS)