10 ka konsehal gikiha

CEBU, Philippines – Napulo ka konsehal sa dakbayan sa Sugbo gipasakaan og kaso nga Mandamus didto sa hukmanan aron pugson sila nga aprobahan na nila ang P2.4 Bilyones nga Supplemental Budget No. 1 nga gisugyot ni Mayor Michael Rama.

Si manlalaban Jose Daluz III, alyado sa Team Rama, mipasaka sa kasong civil didto sa Regional Trial Court (RTC) batok sa mga konsehal nga kaalyado sa Bando Osmeña Pundok-Kauswagan (BOPK).

Ang gikiha mao sila si Acting Cebu City Vice Mayor Nestor Archival, mga konsehal nga sila si Lea Japson, Maryann De Los Santos, Sisinio Andales, Alvin Dizon, Alvin Arcilla, Roberto Cabarrubias, Nida Cabrera, Eugenio Gabuya Jr ug Margot Osmeña.

Si Daluz, nga kanhi konsehal sa dakbayan sa Sugbo ug kauban kaniadto sa grupo sa mga gikiha niya nga konsehal, miingon nga walay rason  ang paglangan-langan ug sa wala pag-aprobar sa gisugyot nga SB-1.

Giawhag ni Daluz ang hukmanan nga human sa pagpahigayon og hearing sa gipasaka niya nga kaso, ang korte angay’ng moisyu dayon og Writ of Preliminary, Mandatory Injunction ug mandoan ang mga konsehal nga tukion ang SB-1 ug ila kining aprobahan.

Ang kasong civil nga gipasaka ni Daluz napunta sa RTC Branch 17. Si Daluz mitataw nga gibasura na sa hukmanan ang Petition for Declaratory Relief nga gipasaka ni Atty. Romulo Torres nga nagkwestyon sa matang sa pagbaligya sa 45 hektareyas nga SRP lots nga gipaagi sa public bidding ug dili pinaagi sa unsolicited proposal.

Si Atty. Torres misang-at og Motion for Reconsideration sa hukom ni RTC Judge Alexander Acosta, apan ang huwes mibasura niini.

Ang balaod naglatid nga ang pagbasura sa huwes sa gisang-at nga MR dili pa maoy katapusan kay makahimo pa ang kihanti pagdangop sa Court of Appeals.

Samtang kagahapon sa ikaduhang higayon sa pagpahigayon unta og special session, wala gihapon matuki ang SB-1 kay wala gihapon motunga ang tanang konsehal nga alyado sa BOPK. – /EIM) (BANAT NEWS)