2 drug courier sikop sa checkpoint

CEBU, Philippines – Duha ka gidudahang drug couriers ang nadakpan sa kapolisan ug nakuhaan og halos P300 mil nga kantidad sa shabu sa gihimo’ng checkpoint sa Alcoy Police ug Regional Public Safety Battalion-7 pasado alas 10 sa nakalabay nga gabii sa Barangay Pugalo.

Ang mga nadakpan mao sila si Mark Joseph Valbuena, 20, drayber sa motorsiklo ug Peter Selywn Duenas, 23, nga pareho’ng nagpuyo sa Sitio Labangon, Poblacion, Dalaguete, ug nakuhaan og P271, 108 nga kantidad sa shabu.

Matud ni Police Officer 3 Andy Gormez, imbestigador, nga samtang naghimo og checkpoint ang kapolisan sa mao’ng dapit ila’ng nasigpatan ang usa ka motorsiklo diin sakay ang duha ka suspek ug wala nag-helmet hinungdan nga ila kini’ng gipahunong. Sa diha’ng gipangayoan sa lisensya, pakyas sa paghatag ang drayber sa motorsiklo.

Nabantayan sa mga polis nga daw sa wala nahimutang ang backrider nga si Duenas kinsa kalit lang nilayat sa motorsiklo ug nisutoy og dagan apan dali ra sab nga nahawiran sa mga polis. Sa dihang kini gipangutana nganong nidagan wala usab kini nitubag. Usa ka putos ang nakita sa kapolisan nga gidala sa drayber diin ila kini nga gipaablihan ug nasuta nga tulo ka medium-size sa gituohang shabu.

Samtang sa pagrekisa sa kapolisan ni Duenas nakuhaan usab kini og 44 ka gagmay nga pakete sa shabu. Si Gormez niingon nga ang duha igo lang gisugo sa paghatud og drugas paingon sa Alcoy, Dalaguete ug uban pa’ng silingan nga lungsod.

Gipaslak na sa selda sa Alcoy Police Station ang duha ka dinakpan nga mag-atubang sa kaso’ng paghupot og drugas nga hayan sa sulod sa prisohan na usab maabtan sa Bag-ong Tuig. – /GMR) (BANAT NEWS)