5 mil ka ‘dalaw’ nakig-uban sa mga priso

CEBU, Philippines – Mokabat ngadto sa singko mil ka mga bisita ang niduaw sa ilang mga minahal sa kinabuhi sa Cebu Provincial Detention and Rehabilitation Center (CPDRC) atol sa adlaw sa Pasko.

Gani anaa na mangatulog ang ubang bisita sa hawanan sa quadrangle aron lang makauban nila pagsaulog sa Pasko ang ilang mga minahal sa kinabuhi nga napriso.

Matud ni CPDRC Jail Consultant Marco Toral nga aduna sab silay salo-salo  nga gihimo sa mga piniriso. Adunay 75 ka mga lechon baboy ang ilang giandam ug pansit nga maoy gisalohan.

Gipahibawo ni Toral nga hugot nga seguridad ang ilang gipatuman diin dunay oras nga ilang gitagana sa mga bisita nga mosud sa CPDRC gikan alas 8 ngadto sa 5 sa hapon. Apan pipila ka mga kabanay  ang wa makasulod kay uwahi kaayong nangabot.

Giklaro ni Toral nga iyang gikasabot ang mga piniriso pinaagi sa ilang gitawag og “Bosyo” – Mayor de Mayores sa mga piniriso nga kun aduna gani mahitabong kagubot, awtomatiko nilang papaulion ang mga bisita ug  ibartolina ang nagdala sa gubot.

Nasurpresa si Toral sa mga piniriso sa dihang nipasundayag kini sila  og usa ka drama nga nag hulagway sa kinabuhi sa usa ka piniriso sud sa CPDRC ug nahimo niining krimen nga maoy hinungdan sa pagkabuwag sa iyang pamilya. – /EIM) (BANAT NEWS)