Nagpatay tungod lang sa tagay

CEBU, Philippines – Miresulta sa pinatyanay ang panaglalis sa duha ka mga lalaki kay ang usa nasuko nga wala hatagi og usa ka “shot” sa giinom nga bino diha sa Barangay Labogon, Dakbayan sa Mandaue niadtong  Domingo sa gabii.

Ang insidente nahitabo didto sa Maria Antonia Village, Barangay Labogon sa maong dakbayan.

Ang mga namatay mao sila si Ruel Ruedas, 42, ug residente sa 3rd St. Maria Antonia Village sa maong barangay ug si Christopher Intica, 44, security guard sa maong village.

Base sa report sa kapulisan sa Basak Police Station kinsa maoy miresponde sa maong panghitabo, si Intica nakig-inom sa usa ka Patricio Velasco Jr.  Ug  naagian ni Ruedas.

Matud pa nga si Ruedas kalit nga milingkod ug nangayo og usa ka shot sa giinom nilang Intica apan mibalibad ang gwardiya ug miingon nga papaliton og kaugalingong ilimnon si Ruedas kun gusto niini moinom.

Si Velasco nga maoy kauban ni Intica atol sa pagkahitabo nga nahinabi sa Banat News miingon human sa pagsulti ni Intica nga papaliton og kaugalingong ilimnon si Ruedas diretso nga gidunggab sa naulahi ang gwardiya.

Si Velasco daling midagan sa iyang motor tungod sa kahadlok apan nakita niya nga bisan samdan  nakadagan ngadto sa guard house si Intica ug nakuha iyang armas ug nibalos pagpusil ni Ruedas ug naigo kini sa nagkadaiyang bahin sa iyang lawas nga miresulta sa iyang kamatayon.

Miabot ang Emergency Rescue Unit Foundation (ERUF) sa crime scene apan patay na nilang naabtan si Ruedas samtang si Intica patay na usab pag-abot tambalanan.

Nakuha sa kapulisan ang mga ebidensiya sama sa kutsilyo ug .38 kalibre nga armas nga maoy gituohang maoy gigamit sa duha. – /EIM) (BANAT NEWS)