Fruit festival sa Carbon nagpadayon

CEBU, Philippines - Subay sa kasaulugan sa Bag-ong Tuig, ang Office of the Carbon Market nga gidumala ni Racquel Bohol Arce isip market administrator sa Dakbayan sa Sugbo ang nagpahigayon sa ikanapulo ka tuig nga Fruit Festival kagahapon.

Tanang klase sa prutas ang gi-display ug gibaligya sa may eskina Magallanes paingon sa Progreso sugod kagahapon ug molungtad kini sa petsa 1 sa Enero.

Sumala pa ni Arce nga ang Fruit Festival gidungan sa paglusad sa Carbon Pasko Na nga anaa na usab sa ikanapulo ka tuig.

Dugang ni Arce nga mas maayo kung ang katawhan anha mamalit sa Carbon tungod kay gawas nga barato, presko pa ug mahangyo pa ang presyo.

Gibutyag usab ni Arce nga kung magduda ang mga mamalitay sa timbang sa ila’ng gipamalit, mahimo ra kini nila’ng ipatimbang sa mga Timbangan ng Bayan nga naa gipakatap sa Carbon aron matawag dayon ang atensiyon sa tindera ug tindero nga ilang gipalitan nga wala mohatag sa sakto nga timbang.  (BANAT NEWS)