8-anyos nabuthan sa piccolo
CEBU, Philippines - Bisan og nahuman na ang pagsaulog sa Pasko, usa ka 8-anyos nga lalaki ang nalandig sa tambalanan human kini nabuthan sa piccolo sa Proper Napo, Dakbayan sa Carcar pasado alas 2 sa hapon niadto’ng Sabado.
Ang bata mao si Joa Kim Loquimario nga nagpuyo sa mao’ng dapit.
Si Police Officer 1 Francisco Saberon, imbestigador sa Carcar City Police, nga nahinabi sa Banat News nagkanayon nga subsob ang ila’ng kampanya sa pagsikop sa mga ilegal nga pabuto apan posible’ng duna pa gihapoy nagpalusot hinungdan nga nakakuha ang bata. Paso sa wala nga bahin sa kamot ang naangkon sa 8-anyos kinsa dali usab nga gidala sa tambalanan.
Matud ni Saberon nga ang piccolo ang sagad nga pabuthon sa mga bata kay kini gagmay nga klase sa pabuto apan delikado usab kaayo.
Usa sa gisubay karon sa kapolisan kung asa gikan nakuha sa bata ang piccolo aron ila’ng masikop ug aron wala na’y subli nga madisgrasya sa mao’ng pabuto.
Hinuon human ang pagsaulog sa Pasko sa mao’ng siyudad kadto pa ang una’ng higayon nga duna’y natala sa kapolisan nga susama’ng insidente.
Gitambagan sa kapolisan ang mga ginikanan nga bantayan ang mga anak ug dili na mopalit og mga pabuto aron dili mangapungkol inig sugat sa Bag-ong Tuig. (BANAT NEWS)
- Latest
