Nagmaoy sa kahubog gidakop

CEBU, Philippines - Labihang pagmahay sa usa ka 52-anyos nga lalaki human kini nadakpan sa kapolisan sa Lungsod sa Pinamungajan diha’ng nanghagis ug nagdala og kutsilyo gumikan sa kahubog sa Sitio Tubod, Poblacion pasado alas 9 sa nakalabay nga gabii.

Ang dinakpan naila nga si Noel Peña, minyo nga nagpuyo sa mao’ng dapit.

Sumala pa ni Senior Police Officer 1 Rey Toquero sa Pinamungajan Police nga nahinabi sa Banat News nga una sila nga nakadawat og trouble alarm human nag-away si Peña ug iya’ng pag-umangkon sa diha’ng sila nag-inom.

Pag-abot sa mga polis ila’ng nakita ang suspek nga nagbitbit og 14-pulgadas nga kutsilyo samtang ubos sa impluwensiya sa ilimnong makahubog.

Diha’ng gibadlong sa mga polis, si Peña nanghagit na hinuon og away ug nilugnot diha’ng gidakop.

Human sa linayugay nakuha sa kapolisan ang kutsilyo nga gibitbit sa suspek ug gibalhog sa selda.

Apan matud pa ni Toquero nga human nahuwasan sa pagkahubog si Peña, dili masukod ang gibati niini nga pagmahay sa iya’ng gibuhat.

Si Toquero niingon nga hilumon ug boutan nga tawo si Peña apan daw sa nalab-anan lang og tagay hangtud nga nagmaoy.

Kini pa usab ang una’ng higayon nga nalambigit sa susamang hitabo ang suspek.

Karong adlawa ipasaka sa kapolisan ang kaso’ng paghupot og hinagiban lakip na ang kaso’ng resistance and disobedience to the agent and person in authority.  (BANAT NEWS)