CSBT ibalik pag-aircondition
CEBU, Philippines – Ang mga pasahero sa Cebu South Bus Terminal dili na unya mag-antos sa kainit tungod kay matauran na unya og mga aircondition ang terminal human nga ang phase 3 nga koneksiyon sa kuryente sa terminal nahuman na kini.
Si Ramon Dumayac, operations manager sa CSBT mibutyag nga gikatakda sa buwan sa Enero sunod tuig pa ma-fully aircondition na ang terminal ug giayo na usab ang mga nangaguba nga mga pultahan sa terminal.
Niadtong Disyembre 11, 2015 nakakuha na sila og building permit sa terminal diin usa kini sa mga rekisitos alang sa pag-convert sa phase 1 nga koneksiyon sa kuryente ngadto sa phase 3 ug isunod na nila karon ang occupancy permit sa terminal.
Sa laing bahin, si Dumayac nagkanayon nga sama sa milabay’ng mga tuig higpit usab karon ang ilang pagpangandam diha sa terminal tungod kay sa matag dunay okasyon daghan ang mga pasahero ang mamauli sa tagsa-tagsa nila ka probinsiya.
Dugang ni Dumayac gipahugtan usab nila ang siguridad diha sa terminal. – /EIM) (BANAT NEWS)
- Latest
