Mga pabuto ipasakmit sa mga barangay officials

CEBU, Philippines – Gihangyo sa Cebu City Disaster Risk Reduction Management Council (CCDRMC) ang mga opisyales sa barangay nga kompiskahon ang mga pabuto sulod sa ilang mga barangay subay sa mando sa City Ordinance 2290 kon pagdili sa pagpamaligya og pabuto sa mga dili designated areas.

Matud pa ni Konsehal Dave Tumulak nga ang gitugotan lang sa kagamhanan sa Sugbo nga makabaligya og pabuto didto lamang sa South Road Properties (SRP).

Gipasabot ni Tumulak nga kini alang sa luwas nga Pasko ug Bag-ong Tuig alang sa tanan ilabi na sa kabataan nga mao gyuy pirmeng mabutang sa peligro ug disgrasya tungod sa pabuto.

Gihangyo usab ni Tumulak nga kinahanglan nga magpundo og tubig sa kabalayan ug ipalayo ang mga bata sa mga delikado nga pabuto.

Karong adlawa ang tanang Emergency Medical Service (EMS) magrekoreda sa mga pahimangno sa fire hazard aron malikayan ang sunog.

Apan nasayran nga sa Barangay Hipodromo, daghang mga tindahan ang tagotago gihapon nga namaligya og mga pabuto sa mga bata ilabi na ang Piccolo diin pirmeng makita ang mga bata nga magpabuto niini diha sa dalan ug mag-initsahay pa niini.

Samtang gipahibalo sa hepe sa kapolisan sa Dakbayan sa Talisay nga mohimo sila og surpresang pagpangronda sa mga namaligya og pabuto  sa nagkadaiyang barangay ug sa kadalanan.

Si Superintendent Germano Mallari nagkanayon nga iya unang giobserbahan ang mga lugar kun hain nag-display og ilegal nga pabuto ang pipila ka mga manindahay.

Si Mallari niingon nga ilang gihingusgan ang pagpanakmit og mga pabuto nga illegal sama sa Piccolo, dagkong triangle, super lolo, watusi ug uban pa nga delikado sa gikusgon ug delikado sa mga kabataan.

Tinguha nila mao ang pagpamenus sa mga biktima unya sa mga pabuto. Ang designated area sa Talisay mao ang dako nga hawan sa Barangay Lagtang aron didto makabaligya niini.

“Atong ipahibawo sa tanan nga ang seguridad sa katawhan ang atong gihuna-huna. Busa angay ‘ta nga mag-amping samtang saulogon ang kapaskuhan,” asoy pa ni Mallari. – /EIM) (BANAT NEWS)