Christmas Tree gikan sa basura nga lata

CEBU, Philippines – Pipila na lang ka adlaw saulogon na ang adlaw sa Pasko, apan sulod sa Spiritual Pastoral Formation Year sa Archbishop Palace,  sa Jakosalem Street ning Dakbayan sa Sugbo, linahi nga klase sa Christmas Tree ang gidalit ni Seminarian Jackie Jay Encarnacion nga lumad nga taga Mabinay Negros. Usa ka “Cake Christmas Tree” ang makita sulod sa SPFY  nga siyam ka tiil ang gitas-on  ug ginama kini gikan sa mga biya nga lata sa pintal nga gigamit sa pagpintal sa mga bungbong sa SPFY ug sa Eukaristiya Garden of Thanksgiving para sa International Eucharistic Congress.

Matud pa ni Encarnacion, gisayangan man siya sa mga lata, hinungdan iyang gipamunit ug nahunahunaan nga gamiton isip Christmas Tree apan sa dihang kini nahuman, pormado gayud siya ug pito ka layer nga cake. Gitug-an ni Encarnacion nga ang mga color nga pintal ra gayud ang iyang napalit tungod kay kasagaran gigamit sa maong Christmas Tree pulos mga recycled nga lata ug gigamit na sa nanglabay nga mga tuig.

Sumala pa ni Encarnacion gisugdan niya ang pagtrabaho  niini niadtong Disyembre 9 ug nahuman Disyembre 18.

Gibutyag ni Encarnacion, sa iyang paghimo sa maong proyekto tuyo lang gayud niya nga mapalain ang konsepto niya sa Christmas tree nga ginama sa biya nga mga gamit, apan dako lang gihapon niyang kalipay nga nakaporma siya niini nga ginama sa lata. – /EIM) (BANAT NEWS)