Mandaue, Lapu-Lapu sudlon sa MyBus

CEBU, Philippines – Makatabang sa pagsulbad sa suliran nga kasakyan sa mga pasahero ug trapiko ang hingpit nga pagbiyahe sa MyBus sa Metro Cebu area diin malakip ang Dakbayan sa Mandaue ug Dakbayan sa Lapu-Lapu.

Si Architect Florentino Nimor, City Planning Officer sa Mandaue, niingon nga ang pagbiyahe sa mao’ng mga bus nga gipanag-iya sa SM makatabang kini sa pagsulbad sa kalisud sa pagsakay sa mga pasahero.

Gitataw ni Nimor nga daghang pasahero ang makasakay sa bus.

Si Land Transportation Franchising and Regulatory Board-7 Director Reynaldo Elnar ang higpit karon nga nag-monitor sa pagtuman sa mga rekisito alang sa pagtugot sa biyahe sa uban pa nga mga MyBus sa Metro Cebu.

Gilatid sa LTFRB-7 ang kantidad sa pletehan sa matag dapit nga malakip sa ila’ng biyahe sama sa P40 sa Dakbayan sa Talisay ug Dakbayan sa Mandaue nga 12-kilometros ang gilay-on, P25 sa Mambaling, Dakbayan sa Sugbo ug Mandaue nga adunay 11  kilometros ug P75 ang Dakbayan sa Talisay ug Mactan-Cebu International Airport nga mokabat sa 24 kilometros ang gilay-on. – /GMR) (BANAT NEWS)