Mamaligya’g refilled LPG canisters pamultahon

CEBU, Philippines – Higpit na nga gidili sa kagamhanan sa Dakbayan sa Mandaue ang pagbaligya sa mga refilled “butane” canisters nga ang sud liquefied petroleum gas (LPG).

Kini human giaprobahan ang ordinansa sa konseho nga gipangamahanan ni Konsehal Jimmy Lumapas.

Ang maong ordinansa nagpahamtang og multa ngadto sa P3,000 sulod sa 24-oras sa tawong masakpang nagbaligya ug makit-ang nagkarga o naghatud niini.

Samtang ang sakyanan nga gikargahan sa mga refilled butane canisters ang ipaubos sa kustodiya sa kagamhanan isip lakip sa mga ebidensiya ug mabalik lamang kini human usab sa pagbayad og multa.

Kun mapakyas pagbayad sa multa sud sa 24-oras ang sakyanan i-impound sa siyudad ug makuha lamang  kun bayran og P5,000 sa city treasurer isip towing fee niini dugang sa P3,000 nga multa.

Sa maong ordinansa maoy gimando ang panagtinabangay sa buhatan sa kapolisan ug Traffic Enforcement Agency of Mandaue (TEAM) uban sa higpit nga pagpakiglambigit sa Technical Working Group sa Department of Energy (DOE) sa pagdakop ug pagsakmit ug ang pagluwat og citation tickets sa molapas niini.

Giawhag usab ang kapolisan ug mga barangay officials ug mga barangay tanod uban sa Department of Trade and Industry (DTI) ug ang Bureau of Product Standards sa pagmonitor sa mga commercial, mga sari-sari store ug kabalayan nga naggamit ug nagbaligya niini. – /EIM) (BANAT NEWS)