Mga Bucor guards nasubornohan — De Lima

CEBU, Philippines – Si kanhi Justice Secretary Leila De Lima miingon nga lisud kaayo sumpoon ang pagpayuhot og shabu didto sa New Bilibid Prisons kun ang mga guwardiya padayong masubornohan.

Dako ang pagtuo ni De Lima nga pipila ka guwardiya sa Bureau of Corrections, ang bilanggoan nga gidumala sa Department of Justice, nasubornohan gyud sa mga tigpayuhot og gidiling drugas.

Si De Lima miingon nga kun siya mapili nga senador sa eleksyon sunod tuig, usa kini sa pangitaan niya og sulbad ug usa niini mao ang paghatag og dakong suweldo sa mga guwardiya aron dili na matental sa mga suborno.

Si De Lima nagkanayon nga usa sa mga objectives sa pagpalabang sa Bureau of Corrections Modernization Law mao ang pagpa-upgrade sa mga suweldo sa jail guards aron dili sila matental sa suborno.

Dihang aktibo pa sa serbisyo si De Lima sa DOJ, siya maoy nangulo sa pagsiksik sa mga selda sa priso didto sa New Bilibid Prisons sa Muntinlupa ug daghan sila nga nakuhang shabu.

Matud ni De Lima nga usa sa mga nag-unang problema sa New Bilibid Prisons mao ang kahuot sa mga piniriso hinungdan nga dili maimplementar ang mga reformation project.  (BANAT NEWS)