Norwegian napilde sa billiard nangulata

CEBU, Philippines – Nakatulog sa prisohan ang usa ka Norwegian human kini nangulata og mga batan-ong Pinoy sa kalagot nga napilde sa billiard sa Barangay Logon (Isla sa Malapascua), Lungsod sa Daanbantayan niadto’ng nakalabay nga gabii.

Ang langyaw giila nga si Petterson Oyvind, 55, temporaryo nga nagpuyo sa mao’ng dapit samtang ang nireklamo sa pagpangulata mao si Victor Monteclar Jr, 18, residente usab sa mao’ng lugar.

Matud ni Police Officer 3 Ressan Moralde sa Daanbantayan Police Station, nga nahinabi sa Banat News nga pasado alas 11 sa nakalabay nga gabii nagdula og billiard ang langyaw kauban ang biktima ug uban pa nga mga batan-on sa mao’ng dapit.

Apan human kini napilde nasuko ang langyaw.

Aron unta paglikay sa gubot nanggawas ang mga batan-on apan sila gisundan sa langyaw ug gipangkulata.

Mga bun-og sa nawong ang naangkon sa biktima kauban ang uban pa’ng mga batan-on.

Si Moralde niingon nga atol sa hitabo ila’ng nasayran nga nakainom diay ang Norwegian hinungdan nga kursonada na kini nga nanggubot.

Human gialarma sa kapolisan ang langyaw, dali usab kini nga gisikop ug gitanggong sa prisohan.

Hinuon pagkabuntag gibuhian ra sa mga polis ang langyaw human nibayad og P15,000 ngadto sa mga biktima. (Jojo C. Ugdol/GMR)(BANAT NEWS)