Kapitolyo sige’ng depensa sa P250M nga ekipo

CEBU, Philippines – Gibarugan pag-ayo sa Bids and Awards Committee (BAC) sa Kapitolyo nga wala’y pagpaburot sa presyo sa P250 milyones nga paliton nga heavy equipment.

Si Provincial Engineer Hector Jamora nagkanayon nga nagpahigayon sila og pre-canvass sa nagkalain-laing kompaniya ug naila nga mga suppliers sa heavy equipment.

Ang presyo nga nakuha nila ang gibasehan sa budget.

Nakabulabog sa presyo ang Mighty Brothers Heavy Equipment nga nitanyag og katunga nga presyo sa pribadong kompaniya sa pareho nga model sa dump truck      nga buot paliton sa Kapitolyo.

Ang mao’ng supplier konektado sa ConEquip Philippines nga mao’y nakadaug sa bidding.

Si Jone Siegfred Sepe, hepe sa Provincial General Services Office ug sakop sa BAC, nagkanayon nga gituman nila ang tanang proseso sa pag-bidding sa heavy equipment.

Niadto’ng Septiyembre 7 gibuksan ang bids nga gitambungan sa mga representante sa Civic Merchandizing Inc., ConEquip Phils. Inc., RDAK Transport Equip Inc. ug TKC Heavy Industries Corp.

Ang JVF Commercials wala nidayun pag-apil sa bidding.

Ang Civic ug RDAK mao’y nakapasar samtang ang TKC ug ConEquip nga giingong konektado usab sa usa’g-usa niduso og motion for consideration human gideklarar nga “Failed”.

Apan niadtong Septiyembre 30, gibuksan ang reconsidered bid sa ConEquip.

Matud ni Sepe nga ang RDAK ug Civic wala naka-comply sa mga rekisitos.

Sa iyang bahin, ang chairman sa BAC nga si Atty. Mark Tolentino nagkanayon nga wala sila’y jurisdiction sa pagsusi sa Mighty Brothers sanglit wala kini niapil sa bidding.

Hinuon si Tolentino nagkanayon nga sa ila’ng nakita ang susama lang nga presyo sa bidding.

Gihimikak usab sa BAC nga ang mga heavy equipment mga ginama sa China.

Ang dokumento sa BAC anaa pa karon sa hunta probinsiyal alang sa review aron mahatag og authority si Gobernador Hilario Davide III sa pag-award sa kontrata. (Brenda D. Batuto/GMR)(BANAT NEWS)