Bus terminal andam na sa manguli

CEBU, Philippines – Nangandam na ang kadagkuan sa Cebu South Bus Terminal alang unya sa pagdagsa sa daghang pasahero nga manguli sa kalungsuran sa pagsaulog sa Pasko ug Bag-ong Tuig.

Gibutyag ni Eddie Dusaban, assistant operations manager sa CSBT, mga kabahin sa ila’ng preparasyon ang pag-aspalto sa luyo nga bahin sa terminal. Giandam na usab nila ang mga railings alang sa linya sa mga pasahero ug mopatuman sila og first come, first serve basis.

Dugang ni Dusaban nga gawas sa mga guwardiya nga nakabantay sa CSBT, mag-deploy sila og dugang 35 ka guwardiya sa matag shift.

May kapolisan usab nga i-deploy sama sa Special Weapon and Tactics (SWAT) Team aron adunay K9 dog sa pagseguro sa seguridad sa mga pasahero.

Ang CSBT may 28 ka close-circuit television (CCTV) cameras nga gimontar diin makita ang tanang kalihukan ug gipaabot usab nila ang gi-order nga walkthrough machine.

Ang entrance sa terminal butangan og metal detector aron masusi gyud og maayo ang mga bagahe sa pasahero ug wala’y makalusot nga mga butang nga makahatag og risgo sa kinabuhi sa tawo.

Gilauman nga sa mga ingon niini’ng okasyon moabot sa 80 mil ka pasahero sa usa ka adlaw ang modagsa sa terminal.

Hinuon asoy ni Dusaban nga ma-accommodate ra ang ingon ka daghan sa mga pasahero sanglit may 285 ka bus ug mini bus nga nagbiyahe.

“Ang mga entrance, ila gyud na’ng inspeksiyunon ang mga pasahero nga magdala og mga bagahe una pa nila pasudlon sa terminal aron maseguro gyud nato nga wala’y explosives nga dala o bisan unsa pa nga mga butang nga mahait nga makadaut sa mga pasahero,” sigun ni Dusaban.

Hugot usab nilang ipatuman ang “no overloading” diin dunay mga sakop sa Land Transportation Franchising and Regulatory Board ug Land Transportation Office ang mosusi aron kalikayan ang disgrasya sa kadalanan.

Pahinumdum ni Dusaban sa mga bus operators, drivers ug konduktor nga kun mahimo dili patas-an ang plete sa bus ug dili pahimuslan ang higayon.

Alang usab niadto’ng mga pasahero aron hapsay ug malinawon ang pag-uli sa tagsa-tagsa ka probinsiya nga motuman sa unsa’y mga gidili. (Decemay P. Padilla/GMR)(BANAT NEWS)