Naghimo og pabuto sa Lapu-Lapu gironda

CEBU, Philippines – Usa ka babaye nga tighimo og illegal nga pabuto ang gidakop sa kapolisan didto sa Purok Lamoy-Kinalumsan, Barangay Gun-ob Huwebes sa alas 4:30 sa hapon.

Matud ni Police Senior Inspector Wilbert Parilla, hepe sa Gun-ob Police Station, ngadto sa Banat News nga ilahang gidakop si Angeles Curacha, 45, human gireklamo sa iyang mga silingan kay naghimo kini og pabrika sa pabuto diha sa ilang lugar.

Sa dihang giadto sa kapolisan ang gikahimutangan ni Curacha, nasakpan  kini nga nagtiwas sa paghimo og pabuto sulod sa iyahang balay kuyog sa iyahang mga trabahante.

Giklaro ni Parilla nga adunay manufacturer’s permit si Curacha didto sa Barangay Babag apan sa Barangay Gun-ob siya naghimo sa mga pabuto.

Nakuha sa kapolisan ang 96 ka gagmay’ng fountains ug laing 83 ka wala pa “unlabelled” nga fountain, 148 ka mga “hotdogs” (klase sa firecracker) nga gipangsulod og mga sako ug upat ka bundles nga lapis sa kawayan.

Dugang ni Parilla, bisan og kumpleto si Curacha og permit, nakalas gihapon kini sa mga patakaran kay naghimo siya niini sa residential area nga peligro sa disgrasya.

Ang suspek miesplikar nga gidala lang niya kadto sa ilang balay aron tiwason, apan nireklamo ang mga tawo sa barangay ug ang barangay mitawag sa mga polis.

Kasong paglapas sa Republic Act (RA) 7183 o “The law on pyrotechnic devices, persons caught manufacturing, selling, distributing and purchasing ” ang atubangon sa suspek.

Si Parilla mihimo usab og inspeksyon sa mga firecrackers display sa Barangay Babag ug didto aduna siya’y nakitang mga kalapasan sama sa kakuwang sama sa balas ug tubig sa matag stalls ug buot niya kining korihian sa mga namaligya og pabuto. (Decemay P. Padilla/EIM)(BANAT NEWS)