Nag-ilog sa P300 nga abang

CEBU, Philippines - Kritikal ang kahimtang sa usa ka magulang human gihansakan og kutsilyo sa dughan sa iyang manghod gumikan sa panag-ilog sa bayad sa ilang gipaabangan nga balay diha sa Sitio Mohon I, Barangay Kinasang-an Pardo ning Dakbayan sa Sugbo pasado alas-9 kagahapon sa buntag.

Giila ang biktima nga si Allan Kiamco, 51, samtang ang suspek mao si Jaime Kiamco, 48,  ang duha pulos wala’y trabaho.

Matud pa ni Police Officer 3 Winston Ybañez, imbestigador sa Homicide Section sa Cebu City Police Office nga nahinabi sa Banat News giawayan sa duha ang P300 nga bayad sa nag-abang sa ilang balay. Sumala pa sa imbestigasyon nga ang manghod mointriga dayon sa abang ngadto sa iyang inahan ug hatagan kini og porsiyento, apan kung ang magulang makadawat sa abang dili na maabot sa ilang inahan ang abang.

Gahapon sa buntag gikomprontasi sa manghod ang magulang human niini nasayran nga wala gihatag sa maguwang ngadto sa ilang inahan ang abang sa balay ug nahibaw-an nga gisugal kini sa maguwang.

Sa kalagot sa manghod mikuha kini og kutsilyo dayon hansak sa dughan makaduha ka higayon ug usa sa liog. Dali usab dayon nga gidala sa Cebu City Medical Center (CCMC) ang biktima diin talandugon ang kahimtang.

Sa follow-up operation sa kapulisan nadakpan ang manghod nga mitago ra usab sa ilang balay. (BANAT NEWS)