Gidaghanon sa gi-dengue nidoble karon
CEBU, Philippines - Misaka og sobra sa usa ka gatos porsiyento ang kaso sa dengue sa Central Visayas karong tuiga kung itandi sa nilabay nga tuig sumala pa sa Regional Epidemiology and Surveillance Unit.
Base sa ilang talaan, miabot ngadto sa 12, 585 ang kaso sa dengue ug 77 na ang nakalas gikan sa Enero hangtod niadtong Disyembre 6 niining tuiga dinhi sa rehiyon.
Mas taas kini og 104 porsiyento sa niaging tuig 2014 nga aduna lamang 6,183 ka kaso ug 26 ang patay. Sagad sa mga natakboyan sa maong sakit mga bata nga nagpangidaron 6 ngadto sa 10-anyos.
Nag-una gihapon sa talaan ang Dakbayan sa Sugbo nga naglangkob sa 17.6 porsiyento sa talaan, gisundan sa Lapu-Lapu nga 5.2% , Mandaue City nga 4.1%, Tagbilaran nga 3.5%, ug Toledo City nga 3.3%.
Atol sa Àsia Pacific Economic Cooperation Summit gipahibalo nila Department of Health Secretary Janette Garin nga aduna nay Dengue Vaccine nga posibleng magamit sa dili pa matapos ang tuig. Apan si RESU Chief Renan Cimafranca nibutyag nga gipaubos pa kini sa pagtuon sa Philippine Food and Drug Administration kung nakasubay ba kini sa regulations and standards. (BANAT NEWS)
- Latest
