Mga pantalan nangandam sa bakasyon

CEBU, Philippines - Sugod karon adlaw nga Biyernes ipaubos na sa red alert status ang mga pantalan sa Dakbayan sa Sugbo tungod kay gipaabot ang pagdagsa sa mga pasahero aron manguli sa ilang tagsa-tagsa ka mga probinsya alang sa bakasyon karong Pasko.

Matud pa ni Edwin Seno, Passenger Terminal Manager sa Cebu Ports Authority, karong Biyernes aduna na silay augmentation nga ipahigayon gikan sa mga partners nila nga ahensiya tungod sa pagdagsang na sa mga pasahero.

Sumala pa ni Seno, aduna  na silay giandam nga plano aron malikayan ang paghuot sa mga pasahero para sa paglikay sa posibleng mahitabo nga stampede.

Giawhag  ni Seno, ang mga pasahero nga dili moadto sa mga terminal sa oras nga pipila na lang ka gutlo molarga ang barko aron dili makatampo nga maghuot ug makasamok sa pantalan.

Gipahibalo ni Seno, nga bawal gayud nga magdala og mga pabuto, shabu, mahait nga hinagiban, ug uban pang mga kontrabando.

Duha ka mga x-ray machines ang ilang gamiton ug aduna pay pisikal nga paghiling sa mga kargamento.

Pun-an usab og unom ka units ang walo nila ka shuttle buses nga maghatud-kuha sa mga pasahero gikan sa passenger terminal padung sa mga berths diin nagpaabot ang ilang sakyan nga barko. (BANAT NEWS)